विद्रोह र क्रान्तिको विरासत जोगाउन आत्मसमीक्षा गरेर अघि बढौँ : अर्जुननरसिंह केसी

लोकपथ संवाददाता

२०७६,फाल्गुन,७,बुधबार १२:००

काठमाडौं- आज फागुन ७ गते राष्ट्रिय प्रजातन्त्र दिवस देशभर विभिन्न कार्यक्रम गरि मनाईंदैछ । वीर सहिदको बलिदानीबाट प्राप्त उपलब्धी संस्थागत भएसँगै कमसेकम न्यूनतम मानिएका विकास निर्माण र विकासका ढोका खोलीनेमा आशावादी जनतामा निराशा छाउन थालेको जगजायर नै छ ।

यसैबीच नेपाली कांग्रेसका नेता तथा पूर्वमन्त्री अर्जुननरसिंह केसीले फागुन सात गतेको यो दिन प्रजातन्त्र दिवस मात्र नभएर संघर्ष, बलिदान, इतिहास र लोकतान्त्रिक नेपालको प्रारम्भसँगै देशको आधुनिकीकरण र विकासको सुरुवात भएको ऐतिहासिक दिन भएको भन्दै सामाजिक सञ्जाल फेसबुक र ट्वीटरमा इमान्दारितापूर्वक आत्मा समीक्षा र आत्मा आलोचना गर्न नेतृत्वलाई सुझाएका छन् । केसीले लेखेका छन्,
”संविधानसभाले संविधान बनाउने प्रतिबद्धताको घोषणा, ०४६ सालको ४९ दिने सफल जनआन्दोलनको शुभारम्भ, २०१५ सालको पहिलो आमनिर्वाचन, आदि विविध सन्दर्भ पनि यही फागुन ७ संगै जोडिएको बहुआयामिक ऐतिहासिक दिवस हो यो दिन। प्रजातन्त्र दिवस ।
त्यसअघिका सबै असफल आन्दोलन, विद्रोह र क्रान्तिको विरासत र उत्तराधिकारी हो यो जनक्रान्ति र प्रजातन्त्र दिवस ।
आज को दिन प्रथमत सरकार र राष्ट्रिय जीवन का सबै पक्ष ले सूक्ष्म विश्लेषण र सिंहावलोकन गर्दै देखिएका भ्रष्टाचार, अन्याय,अनियमितता, विकृती महँगी,हत्या, हिँसा, बलात्कार, विधिविहिनता र बेरोजगारी को पराकाष्टा को आत्मसमीक्षा को आवश्यक छ।
के वर्तमान स्थितिले यो ऐतिहासिक परिवर्तन र सहिदहरुको बलिदान को रक्षा भएको महसुस हुनसकेको छ ? इमान्दारितापूर्वक आत्मा समीक्षा र आत्मा आलोचना गरौ हामी कहाँ कहाँ चुकेका छौं यस्को यथार्थ समीक्षा र सुधार नै वास्तविक अर्थ मा प्रजातन्त्र दिवस प्रति को सम्मान हुनेछ।

अतः यस युगान्तकारी दिवसको सुखद अवसरमा म सम्पूर्ण ज्ञात–अज्ञात सहिदहरूप्रति भावपूर्ण श्रद्धासुमन, क्रान्तिका वीर एवं पौरखी सेनानीहरूप्रति हार्दिक अभिवादनका साथ समस्त प्रजातन्त्रप्रेमी र प्रजातन्त्रवादी दिदीबहिनी दाजुभाईहरूमा हार्दिक शुभकामना व्यक्त गर्दछु । ”