काठमाडौं– पुराना वामपन्थी नेता तथा नुवाकोटका पूर्वसांसद गणेश पण्डितको मंगलबार हृदयाघातबाट निधन भयो । ७० वर्षीय पण्डितको शिक्षण अस्पताल महाराजगञ्जमा उपचारको क्रममा निधन भएको थियो ।
विसं २०४८ को निर्वाचनमा उनी नुवाकोट–२ बाट तत्कालीन नेकपा एमालेबाट निर्वाचित भएका थिए । विसं २०५६ को निर्वाचनमा उनी नुवाकोटबाट तत्कालीन नेकपा मालेबाट उम्मेदवार बनेका थिए ।
नेपाल राष्ट्रिय शिक्षक सङ्गठनको केन्द्रीय उपाध्यक्षसमेत रहेका पण्डित २०४२ सालका बमकाण्डमा गिरफ्तारमा परेका थिए । झण्डै ८ महिना प्रहरी हिरासतमा उनी रहेका थिए । तत्कालीन राष्ट्रिय पञ्चायात सदस्यमा समेत उनी नुवाकोटबाट उम्मेवार बनेका थिए ।
काठमाडौँको वसुन्धरामा बस्दै आएका पण्डितका दुई छोरा, तीन छोरी र श्रीमती छन् । पण्डित काँग्रेस नेता अर्जुन नरसिंह केसीको मामा पनि हुन् । यसो त पण्डितको निधनमा भान्जाहरु जनदीशवरनरसिंह, केदारनरसिंहलगायत केसी परिवारले पनि श्रद्धाञ्जली दिएका छन् ।
अर्जुन नरसिंह केसीले आफ्नो मामाको निधनमा फेसबुकमा लामो स्टाटस लेख्दै यसरी श्रद्धाञ्जली दिएका छन् :
भावपूर्ण श्रद्धाञ्जली तथा समवेदना !
अहिले म धर्मपत्नी प्रतिमासहित सम्पूर्ण परिवार अत्यन्त दुःखद र शोकमग्न अवस्थामा छौँ । बुबा–आमाको दुखद निधनको शोकपछि हामीलाई आदरणीय ठूलो मामा गणेश पण्डितज्यूको निधनले त्यति नै स्तब्ध र दुःखी बनाएको छ । यो क्षणलाई परिभाषित गर्न मसँग शब्द छैन ।आदरणीय मामा गणेश पण्डितज्यू हामी सबैलाई दुःखी बनाएर फाल्गुन २१ गते यो संसारबाट विदा हुनुभयो । पारिवारिक सम्बन्धले उहाँ मामा भए पनि ९ महिना मात्रको फरक उमेरका कारण हामीवीच समकालीन मित्रवत ब्यवहार थियो । हाम्रो प्रारम्भिक शिक्षाको एक कालखण्ड मेरो घर, राउतबेँसीमा मँसगै र अर्को कालखण्ड मामाघर (शिखरबेँसी, नुवाकोट) मा भएकोले उहाँसँग बाल्यकालदेखि नै मेरो घनिष्टता रह्यो ।
त्यसपछिको शिक्षाका लागि हामी मामा–भाञ्जा सँगसँगै काठमाडौँ आयौँ र कालधारास्थित मेरी फुपूको घरमा सँगै बस्यौँ, लैनचौरको शान्ति विद्यागृहमा एकैपटक ७ कक्षामा भर्ना भयौँ । त्यसकारण वाल्यकालदेखि आखिरी दिनसम्म उहाँसँगको सान्निध्य अविष्मरणीय छ । सम्बन्ध र ब्यवहारले एक अभिभावकको रुपमा मामाको भूमिका सदैव कायम रह्यो । एउटा कालक्रममा राजनीतिक आस्थामा केही भिन्नता भए पनि गृहजिल्ला नुवाकोटको शैक्षिक, सामाजिक र सांस्कृतिक उन्नतिको विषयमा र पारिवारिक सम्बन्धमा हामीवीच अभिन्नता थियो ।
मामाको निधनबाट विगतका स्मरणहरू मनभित्र जागृत भइरहेका छन् । समकालीन उमेर भएका कारण मलाई सम्झना छ, आमाले हामी दुवैलाई एकसाथ काखमा राखेर खुवाएको । बाल्यकालमा मामासँग घुमेको, खेलेको, पढेको र उहाँको जीवनको आखिरी दिनसम्म उहाँले मेराप्रति दर्शाउनुभएको स्नेह, भरोसा, देखेको बास्तविकताका आधारमा पाउनेगरेको सल्लाह अब यी सबै विगत र स्मृतिका विषयमात्र भए ।
मामाको भद्रता, शालिनता, गहिरो बौद्धिक खुबी, विज्ञान र अध्यात्मका बीचको सन्तुलन कला, संकटमा नआत्तिने र सहज स्थितिमा नमात्तिने समुद्रवत स्वभाव आदि अनेकौँ मानवीय गुणहरूको गाढा प्रभाव हामी सबैमा छ र रहिरहने छ । मामा दिवंगत हुनुभो । भोली उहाँको पार्थिव शरीर पञ्चतत्वमा विलिन हुनेछ । तर उहाँप्रतिको श्रद्धा, सम्झना, उहाँले मलगायत हाम्रो समस्त परिवारमा छोडेर जानुभएको योगदान उहाँका प्रातः स्मरणीय निधिका रुपमा हामी सँगालेर राखिरहने छौँ । उहाँले छोडेर जानुभएका अधूरा कार्यहरूलाई पूर्णता दिनु हामी सबैको जिम्मेवारी हुनेछ ।
उहाँप्रति भावपूर्ण श्रद्धान्जलीका साथ दिवंगत आत्माको चीर शान्तिको निम्ति प्रार्थना गर्दै शोकाकूल आदरणीय माइजू, आदरणीय मामा कुमार पण्डितज्यू, भाईहरू– राजकुमार, किशोर, दिनेश लगायत शोकसन्तप्त समस्त परिवारजनमा गहिरो समवेदना छ । दुःखको यस घडीमा हामी समस्त परिवार तपाईंहरूकै साथमा छौँ ।
अर्जुननरसिंह / श्रीमती प्रतिमा के.सी.
यो खबर पढेर तपाईलाई कस्तो महसुस भयो ?
प्रतिक्रिया