काठमाडौं – रोल्पामा बम विस्फोट हुँदा ४ जना बालबालिकाको मृत्यु भएको गहुँबारी नजिकै अर्को बम पनि फेला परेको छ । विस्फोटस्थल नजिकै प्रहरीले विस्फोट नभएको एक थान बम फेला पारेको हो । घटनास्थल नजिकै अर्को बम पनि फेला परेपछि मृतक बालबालिकाको शव घटनास्थलमै छन् ।
विस्फोट नभएको बम समेत नजिकै फेला परेकोले शव उठाउन नसकिएको रोल्पाका प्रहरी नायब उपरिक्षक (डिसपी) चित्रबहादुर गुरुङले लोकपथलाई जानकारी दिए । डिसपी गुरुङका अनुसार रातभर प्रहरीले शवको सुरक्षा दिनेछ । यसैबीच नेपाली सेनाको बम डिस्पोजल टोली घटनास्थल जाँदैछ ।
रोल्पाको त्रिवेणी गाउँपालिका वडा नम्बर ७* स्थित गैरीगाउँ भन्ने स्थानमा रहेको गहुँबारीमा बिहीबार साँझ बम विस्फोट हुँदा ४ जना बालबालिकाको घटनास्थलमा नै मृत्यु भएको थियो । बम विस्फोटमा परि मृत्यु हुनेमा ५ वर्षिय विजय खत्री, ११ वर्षिय विमला खत्री, १३ वर्षिय गौरब नेपाल र १४ वर्षिय लोकीराम डाँगी रहेका छन् ।
मृतक ११ वर्षिय विमला खत्री र ५ वर्षिय विजय खत्री एकै परिवारको भएको डिएसपी गुरुङले लोकपथलाई जानकारी दिए । मृतक ४ जना बालबालिका गहुँबारीमा बाख्रा चराउन गोठालो जाँदा उक्त वस्तु फेला परेर खेलाउँदा विष्फोट भएको थियो । प्रहरीले घटनास्थल सिल गरिसकेको छ ।
गाउँको नजिकै गोठाला गएका उनीहरुले युद्धताकाका बम विफोटमा ज्यान गुमाउनु परेको भन्दै आफन्त र परिवारका सदस्य मर्माहत भएका छन् । प्राप्त जानकारी अनुसार युद्धताका रोल्पाको दुम्ला जंगलमा भिडन्तसमेत भएको थियो।
बेबारिसे अवस्थामा फेला परेको बम गोठाला गएका बालबालिकाले खेलाउने क्रममा विस्फोट भएको प्रहरीको अनुमान छ । ठूलो आवाजसहित विष्फोट भएको उक्त बम ‘टु ईन्च मोटर’ रहेको प्रहरीको आशंका छ । यतिबेला सिंगो गाउँ शोकमा डुबेको छ भने गाउँले त्रसित भएका छन् ।
घटनाबारे थप अनुसन्धान भइरहेको प्रहरीले जनाएको छ ।
*(यसअघि वडा नम्बर ७ हुनुपर्नेमा अन्यथा भएकोले सच्याईएको छ ।-सम्पादक )
यसअघि लोकपथमा प्रकाशित समाचार :
रोल्पामा बम विस्फोट अपडेट: बाख्रा चराउन गएका थिए मृतक चारै जना
रोल्पामा बम विस्फोट, ४ जनाको मृत्यु
यो समाचार छुटाउनुभएको थियो कि ?
तीन वर्षीय बालिका जसले बम विस्फोट हुँदा हाँस्न सिकिन् (भिडियोसहित)
यो खबर पढेर तपाईलाई कस्तो महसुस भयो ?
प्रतिक्रिया