सीमा अतिक्रमण विरुद्ध तात्यो नेविसंघ, गोरखामा राँके जुलुस

लोकपथ संवाददाता

२०७७,बैशाख,२८,आईतवार २०:३३

काठमाडौं । नेपालको लिपुलेक हुँदै सडक निर्माण गरी उद्घाटन गरेको भारत सरकारको विरोधमा आइतबार देशभर विरोध प्रर्दशन भयो । देशका प्रमुख शहरहरुमा पनि युवाहरु निस्केर भारतको हेपाहा प्रवृतिको व्यापक विरोध भयो । यसैबीच आज आईतबार साँझ गोरखा सदरमुकाम गोरखा बजारमा राँके जुलुस प्रदर्शन गरीएको छ । लिपुलेकमा नेपाली भूमि अतिक्रमण गरेर सडक निर्माण गरेको विरोधमा राँके जुलुस प्रदर्शन गरिएको नेविसंघले जनाएको छ ।

उनिहरुले लिपुलेक हाम्रो हो, भारतीय विस्तारवाद मुर्दावाद, नालायक सरकार राजीनामा दे, सीमा मिच्न पाईदैन जस्ता नारा लगाउँदै राँको लिएर सडकमा उत्रिएका थिए । उनीहरुले गोरखा सदरमुकामको घ्याम्पेशाल चोकदेखि हरमटारी चोकमा जुलुससहित कोण सभा गरेका हुन् ।

कोणसभामा बोल्दै नेविसंघका अध्यक्ष सुवास अधिकारीले भारत सरकारले धार्चुलाबाट लिपुलेकसम्म सडक निर्माण गरेको विषयमा सरकार उदासिन बनेको आरोप लगाएका थिए । आफ्नो भूमी मिचिँदासमेत सरकारले पत्तो नपाउनु देश प्रतिको र नेपाली जनता प्रतिको अन्तर्घात भएको आरोप लगाउँदै नेविसंघले राँके जुलुस निकालेको अधिकारीले बताए ।

‘आफ्नो भूमी मिचिँदा सरकार मौन छ । सरकारको आधिकारीक प्रतिक्रिया आएको छैन । फिर्ता ल्याउन कुनै पहल भएको छैन’, उनले भने, ‘सही छाप नभएको विज्ञप्ती जारी गर्नुले सरकार डराएको प्रष्ट हुन्छ ।’