मन्त्री घिसिङको चेतावनी– ‘सुशासन कार्यान्वयन नगरे ठूलो विद्रोह हुनेछ’

काठमाडौं । उर्जा, जलस्रोत तथा सिंचाईमन्त्री कुलमान घिसिङले जेनजी पुस्ताले अघि सारेका मागहरू भ्रष्टाचारको अन्त्य र सुशासनको स्थापना रहेको बताएका छन् ।

नेपाल विद्युत् प्राधिकरणले आयोजना गरेको शुभकामना आदान–प्रदान कार्यक्रममा बोल्दै उनले देशमा रहेका बेथितिको अन्त्य गरी समृद्धितर्फ अघि बढाउनुपर्ने आवश्यकता औँल्याए ।

मन्त्री घिसिङले युवापुस्ताले देशभित्रै बसेर काम गर्न पाउने वातावरण खोजिरहेको बताउँदै सो चाहना पूरा गर्न सरकार जिम्मेवार हुनुपर्ने धारणा राखे । उनले सुशासनलाई गम्भीरतापूर्वक कार्यान्वयन नगरे ठुलो विद्रोह हुने चेतावनी समेत दिए ।

उनले भने, ‘भ्रष्टाचारको निर्मूल गर्ने, सुशासन कायम गर्ने प्रमुख माग हो । कतै जनताको सेवामा कमी हुन दिनु हुँदैन । कतैपनि अनियमितता वा भ्रष्टाचार क्षम्य हुँदैन । कसैले अनियमितता र भ्रष्टाचारको गन्ध दिए तत्काल कारबाही हुन्छ ।’

मन्त्री घिसिङले प्राधिकरणभित्र पनि कुनै किसिमको अनियमितता सह्य नहुने स्पष्ट पार्दै सबै कर्मचारीलाई जिम्मेवार भएर सुशासन कायम गर्न निर्देशन दिए ।

उनले जोड दिँदै भने, ‘हामीले अब चुक्ने ठाउँ छैन, यदि फेरि त्यस्ता गतिविधि भए ठुलो जनआक्रोश हुने छ, जसले कसैलाई पनि छोड्ने छैन ।’