काठमाडौं । नेकपा एकीकृत समाजवादीका अध्यक्ष माधवकुमार नेपालले अमेरिकी सहयोग परियोजना एमसीसी सम्झौता पारित गर्न आफ्नो पार्टीले लिएको अडान राष्ट्रिय अडान बन्न पुगेको बताएका छन् ।
बुधबार पार्टीको पोलिट्ब्युरो समितिको बैठकमा राजनीतिक प्रतिवेदन पेस गर्दै उनले एमसीसी ‘व्याख्यात्मक घोषणासहित’पारित गर्नु आफ्नाे पार्टीकाे मुख्य भूमिका रहेकाे समेत दाबी गरेका छन् ।
‘हाम्रो पार्टीले उक्त कम्प्याक्टमा भएका कतिपय गलत र दोहोरो अर्थ लाग्ने विषयहरुको बारेमा स्पष्ट निरुपण नगरी अनुमोदन गर्न हुँदैन भनेर निर्णयसहित दृढ अडान लियो, हाम्रो पार्टीको अडान नै हाम्रो राष्ट्रिय अडान बन्यो’ अध्यक्ष नेपालले भनेका छन् ।
उनले आफूहरूले साथ नदिएको भए नेपाली कांग्रेस र नेकपा एमाले मिलेर एमसीसी सम्झौता पारित गर्ने र आफ्नो पार्टीको अस्तित्व नै समाप्त पार्ने जोखिम रहेको समेत बताए ।
एमसीसीको विपक्षमा रहेको भए सत्तारुढ गठबन्धन तोडेर कांग्रेस र एमालेले एमसीसी जस्ताको तस्तै पारित गर्ने, आफूहरुको १४ सांसदलाई कारबाही गर्ने र पार्टीको अस्तित्व नै समाप्त पार्ने जोखिम रहेको बताएका हुन् ।
अध्यक्ष नेपालले भनेका छन्, ‘यदि हामीले यसो नगरेको भए नेका र एमाले मिलेर पाँचदलीय गठबन्धनलाई तोड्ने, सभामुखलाई हटाउने र हाम्रो पार्टीका १४ जना सांसदलाई कारबाही गर्नेगरी कांग्रेस र एमाले मिलेर एमसीसी जस्ताको तस्तै अनुमोदन गर्ने तयारीमा थिए ।’
उनले वैकल्पिक बाटो रोजेर ती सबै खतरालाई टार्न सफल भएकाे बताएका छन् ।
यो खबर पढेर तपाईलाई कस्तो महसुस भयो ?
प्रतिक्रिया