अध्यादेश खारेज भएपछि व्यवसायी अन्योलमा

नेपाल चिनी उत्पादक संघले गृहमन्त्री बालकृष्ण खाणलाई भेटेर तेजाब वा अन्य घातक रासायनिक पदार्थ उत्पादन निकासी वा पैठारीका लागि बनाइएको अध्यादेश खारेज भएपछिको अन्यौल फुकाइदिन आग्रह गरेको छ ।

मंगलबार गृह मन्त्रालयमा अध्यक्ष शशिकान्त अग्रवालको नेतृत्वमा उपाध्याक्ष राजकुमार अग्रवाल तथा सदस्यहरू शिखर श्रेष्ठ, विरेन्द्र कनौडिया र विमल केडियाले अब चिनी मिल सञ्चालन गर्नका लागि एक महिना मात्रै बाँकी रहेकाले आध्यादेश राखेज भएपछिको अन्यौलता फुकाइदिन आग्रह गरेको हो । यसभन्दा अघिल्लो केपी शर्मा ओली नेतृत्वको सरकारले ल्याएको यो अध्यादेश आएको ६ महिनासम्म संसद्मा पेस नभएकाले स्वतः खारेज भएको थियो ।

अध्यादेश खारेज भएपछि त्यसअनुरुप बनेको कार्यविधि स्वतः खारेज भएको र पुरानो कार्यविधि अनुरुप चिनी निर्माणका लागि आवश्यक पर्ने कच्चा पदार्थ आयात गर्दा कम्तिमा दुई महिना लाग्ने भन्दै अन्यौलता फुकाइदिन गृहमन्त्री खाणलाई आग्रह गरेको टोलीमा सहभागी सदस्य श्रेष्ठले जानकारी दिए ।

टोलीको माग सुनेपछि मन्त्रालयका प्रवक्ता फणिन्द्रमणि पोखरेलले नयाँ कार्यविधि बनाउने विषयमा शुक्रबार सरोकारवाला पक्षसँग मन्त्रालयले छलफल आयोजना गरेको र त्यो छलफलबाट टुंग्याउने जानकारी दिए ।
गृहमन्त्री खाणले अन्यौलता हटाउन तत्काल पहल गर्न प्रवक्ता पोखरेललाई निर्देशन दिए ।
कार्यविधि नहुँदा चिनी बनाउन अत्यावश्यक पर्ने कच्चा पदार्थ ‘सल्फर’ आयात गर्न कठिन हुने टोलीको भनाइ थियो । ‘सल्फर’ भारतबाट ल्याउनुपर्छ ।