काठमाडौं । पाकिस्तानका पूर्वप्रधानमन्त्री इमरान खानको ज्यान जोखिममा रहेको भन्दै उनका छोरा कासिम खानले अन्तर्राष्ट्रिय समुदायसँग तत्काल हस्तक्षेप गर्न अपिल गरेका छन् ।
सामाजिक सञ्जाल एक्समार्फत सन्देश सार्वजनिक गर्दै कासिमले आफ्ना बुबाको सुरक्षालाई लिएर गम्भीर चिन्ता व्यक्त गरेका हुन् । उनले सेना प्रमुख असीम मुनीरको नेतृत्वमा रहेको पाकिस्तानी सैन्य प्रशासनमाथि हत्या, अपहरण र यातनाजस्ता गतिविधिमा संलग्न रहेको आरोप लगाएका छन् ।
उनले सैन्य नेतृत्वले संवाद र तर्कको कुरा नसुन्ने दाबी गर्दै आफ्ना बुबाको ज्यान जानुअघि नै अन्तर्राष्ट्रिय समुदायले आवश्यक कदम चाल्नुपर्ने बताएका छन् ।
यसैबीच, अन्तर्राष्ट्रिय मानव अधिकार संस्था एम्नेस्टी इन्टरनेसनलले इमरान खान र उनकी पत्नी बुशरा बीबीको हिरासत अवस्था, स्वास्थ्य उपचार तथा परिवार र कानुनी प्रतिनिधिसँगको भेटघाटमा लगाइएको प्रतिबन्धप्रति गम्भीर चिन्ता व्यक्त गरेको छ ।
एम्नेस्टीका अनुसार इमरान खानलाई सन् २०२५ डिसेम्बरदेखि परिवारका सदस्यसँग भेट गर्न दिइएको छैन । सन् २०२६ अगस्टमा उनले आफ्नी बहिनीसँग दुई पटक भेट्ने अवसर पाए पनि मार्चदेखि छोराहरूसँग टेलिफोनमा कुराकानी गर्न पाएका छैनन् ।
७४ वर्षीय इमरानलाई एकान्त कारावासमा राख्दा उनको मानसिक तथा शारीरिक स्वास्थ्यमा गम्भीर असर पर्न सक्ने एम्नेस्टीले चेतावनी दिएको छ ।
संस्थाले इमरान खानमा रक्तचापसम्बन्धी गम्भीर समस्या रहेको उल्लेख गर्दै सर्वोच्च अदालतको आदेश हुँदाहुँदै पनि स्वतन्त्र चिकित्सकबाट उपचारको व्यवस्था नगरिएको आरोप लगाएको छ । त्यस्तै, बुशरा बीबीको आँखासम्बन्धी रोगको पर्याप्त उपचार नभए दृष्टि गुम्ने जोखिम रहेको जनाएको छ ।
एम्नेस्टीले उनीहरूलाई हिरासतमा राखिएको अवस्था नागरिक तथा राजनीतिक अधिकारसम्बन्धी अन्तर्राष्ट्रिय अनुबन्धको धारा १० विपरीत रहेको बताएको छ । अधिकारका पक्षमा आवाज उठाएकै कारण इमरानका परिवारका सदस्यलाई समेत पक्राउ गरिएको भन्दै संस्थाले आपत्ति जनाएको छ ।
एम्नेस्टीका अनुसार पाकिस्तान तहरीक–ए–इन्साफ (पीटीआई) को इस्लामाबाद मार्चसँग सम्बन्धित घटनामा इमरानका तीन बहिनीलाई सेप्टेम्बर २० र २१ मा सार्वजनिक व्यवस्था कायम गर्ने ऐन, १९६० अन्तर्गत पक्राउ गरिएको थियो । तीमध्ये दुई जना रिहा भए पनि अलीमा खान अझै लाहोरस्थित कोट लखपत जेलमा थुनामा छिन् ।
एम्नेस्टीले इमरान खान र बुशरा बीबीलाई पर्याप्त स्वास्थ्य उपचार उपलब्ध गराउन, परिवारका सदस्य तथा वकिलसँग नियमित भेटघाटको व्यवस्था गर्न र अलीमा खानलाई तत्काल रिहा गर्न पाकिस्तानी अधिकारीहरूसँग माग गरेको छ ।
यो खबर पढेर तपाईलाई कस्तो महसुस भयो ?















प्रतिक्रिया