काठमाडौं । अमेरिकी राष्ट्रपति डोनाल्ड ट्रम्पले इरानलाई बुधबारसम्म कुनै सहमति नभए व्यापक सैन्य आक्रमण सुरु गर्ने चेतावनी दिएका छन् ।
यसअघि घोषणा गरिएको दुई हप्ते युद्धविराम अप्रिल २२ बुधबार समाप्त हुने अवस्थामा पुगेको छ, र त्यसलाई थप लम्ब्याउने सम्भावना न्यून रहेको उनले बताएका छन् ।
ब्लूमबर्गसँगको टेलिफोन अन्तर्वार्तामा ट्रम्पले आफू कुनै पनि खराब सम्झौता गर्न हतार नगर्ने स्पष्ट पारे । उनका अनुसार, समय अमेरिकाको पक्षमा रहेको छ र इरानमाथि दबाब कायम राखिनेछ । सहमति नभए तत्कालै पुनः द्वन्द्व सुरु हुन सक्ने संकेत उनले दिएका छन् ।
ट्रम्पले पाकिस्तानको इस्लामाबादमा प्रस्तावित शान्ति वार्ताबाट अपेक्षा व्यक्त गरे पनि इरानले ती वार्ताहरू अस्वीकार गरिसकेको बताइएको छ । साथै, उनले ग्यासको मूल्य र क्षेत्रीय सुरक्षाको विषयमा पनि टिप्पणी गरेका छन् । युद्ध अन्त्यका लागि आवश्यक परे इरानका नयाँ नेतृत्वसँग प्रत्यक्ष भेट गर्न आफू तयार रहेको पनि उनले बताएका छन् ।
ट्रम्पले आफू इजरायलको कारण मात्र यो द्वन्द्वमा संलग्न नभएको उल्लेख गर्दै मुख्य कारण ७ अक्टोबरमा हमासद्वारा गरिएको आक्रमण भएको बताए । उक्त आक्रमणमा करिब १,२०० इजरायलीको मृत्यु भएको थियो। यस घटनाले इरानलाई कहिल्यै पनि परमाणु हतियार प्राप्त गर्न नदिनुपर्ने आफ्नो अडान थप बलियो बनेको उनले जनाए ।
उनले आफ्नो सामाजिक सञ्जाल ट्रुथ सोसलमा लेखेका छन्, ‘इरानसँगको युद्धले महत्वपूर्ण परिणाम दिनेछ । यदि इरानका नयाँ नेताहरू बुद्धिमानीपूर्वक निर्णय गर्छन् भने देशको भविष्य समृद्ध हुन सक्छ ।’
यता, पाकिस्तानका आर्मी चिफ असिम मुनिरले ट्रम्पसँग टेलिफोनमा कुराकानी गर्दै इरान–अमेरिका वार्तामा देखिएको अवरोधबारे चिन्ता व्यक्त गरेका छन् । रोयटर्सका अनुसार, उनले अमेरिकाद्वारा इरानी बन्दरगाहहरूमा लगाइएको नाकाबन्दी इस्लामाबादमा हुने वार्ताको दोस्रो चरणका लागि ठूलो बाधा बनेको बताएका छन् ।
मुनिरले हालै तेहरानको तीनदिने भ्रमणका क्रममा इरानका राष्ट्रपति, विदेशमन्त्री तथा उच्च सैन्य अधिकारीहरूसँग भेट गरेका थिए । उनले इरानलाई पुनः वार्तामा ल्याउने प्रयास गरे पनि इरानले आफ्ना राष्ट्रिय हितलाई प्राथमिकता दिएको देखिएको छ ।
अमेरिकी प्रतिनिधिमण्डल अप्रिल २० मा इस्लामाबाद पुग्ने अपेक्षा गरिएको थियो भने इरानी टोली पनि सहभागी हुने योजना थियो। यद्यपि, वार्तामा सहभागी हुने अधिकारीहरूबारे स्पष्ट विवरण सार्वजनिक भइसकेको छैन । इस्लामाबादमा सुरक्षा व्यवस्था भने कडा पारिएको छ ।
यो खबर पढेर तपाईलाई कस्तो महसुस भयो ?
प्रतिक्रिया