मानवअधिकार आयोगद्वारा हिंसात्मक नहुन प्रदर्शनकारीलाई आग्रह

काठमाडौं । राष्ट्रिय मानवअधिकार आयोगले आन्दोलनरत ‘जेनजी’ समूहलाई हिंसात्मक कदम उठाउन नहुन आग्रह गरेको छ ।

आयोगले आन्दोलनकारीलाई संयम अपनाउन भनेको छ भने सरकारलाई पनि समूहका माग सम्बोधन गर्न ध्यान दिन अनुरोध गरेको छ ।

आयोगका प्रवक्ता डाटीकाराम पोखरेलका अनुसार, सोमबारदेखिकै ‘जेनजी’ समूहको प्रदर्शनको अनुगमन भइरहेको छ । अनुगमनका क्रममा सरकारले अत्याधिक बल प्रयोग गरेको पाइएको छ। १९ जनाको मृत्युले पनि सरकारद्वारा अत्याधिक बल प्रयोग भएको पुष्टि भएको उनले बताए ।

यस घटनाको छानबिनका लागि आयोगले डा.लिली थापाको संयोजकत्वमा अनुसन्धान टोली गठन गरेको छ । टोलीले प्रदर्शनका क्रममा भएका मानवअधिकार उल्लङ्घनको विवरण संकलन गरी दोषीलाई कारबाही गर्न र पीडितलाई क्षतिपूर्ति उपलब्ध गराउने सिफारिस गर्नेछ। टोलीले मंगलबारदेखि काम थाल्ने आयोगले जनाएको छ ।

आयोगले उक्त घटनालाई निन्दनीय बताउँदै मानवअधिकारको अन्तर्राष्ट्रिय मूल्य मान्यता, नेपालको संविधान तथा कानूनको विपरीत रहेको जनाएको छ । हत्याको घटनामा संलग्न दोषीलाई कानूनी दायरामा ल्याउने प्रतिबद्धता आयोगले जनाएको छ ।