काठमाडौं । राष्ट्रिय स्वतन्त्र पार्टी (रास्वपा) का नवनिर्वाचित पदाधिकारी र केन्द्रीय सदस्यले शपथग्रहण गरेका छन् ।
पार्टीको केन्द्रीय कार्यालय चमतीमा आयोजित कार्यक्रममा सभापति रवि लामिछानेले उनीहरूलाई शपथ गराएका हुन् ।
चितवनमा सम्पन्न पार्टीको पहिलो महाधिवेशनबाट ९९ जना केन्द्रीय सदस्य चयन भएका थिए। महाधिवेशनले रवि लामिछानेलाई सभापति, स्वर्णिम वाग्ले र सोविता गौतमलाई उपसभापति तथा विपिन आचार्यलाई महामन्त्रीमा निर्वाचित गरेको थियो ।
यस्तै, हरि ढकाल, असिम शाह र निशा डाँगी सहमहामन्त्रीमा निर्वाचित भएका छन् ।
पार्टी विधानअनुसार १९ पदाधिकारीमध्ये वरिष्ठ नेतासहित ११ जना पदाधिकारी र ५१ जना केन्द्रीय सदस्य पछि मनोनीत गरिने व्यवस्था छ ।
शपथग्रहणपछि सभापति लामिछानेले नवनिर्वाचित पदाधिकारी र केन्द्रीय सदस्यलाई प्रमाणपत्र तथा रास्वपाको घण्टी चिन्ह अंकित चिनो प्रदान गरेका थिए ।
यो खबर पढेर तपाईलाई कस्तो महसुस भयो ?
प्रतिक्रिया