एपीएफ स्कुलकी लेखा अधिकृत कल्पना गुरुङको बदमासी : स्कुलको खाताको साढे ४ करोड रुपैयाँ व्यक्तिगत खातामा 

काठमाडौं । कीर्तिपुरस्थित नेपाल एपीएफ स्कुलकी लेखा अधिकृत सशस्त्र प्रहरी निरीक्षक कल्पना गुरुङले स्कुलको बैंक खातामा राख्नुपर्ने रकम व्यक्तिगत बैंक खातामा राखेको भन्दै उजुरी परेपछि सशस्त्र प्रहरी प्रधान कार्यालयले छानबिन थालेको छ । 

साढे ६ वर्षदेखि लगातार स्कुलको लेखा अधिकृतको जिम्मेवारी सम्हाल्दै आएकी सशस्त्र प्रहरी निरीक्षक गुरुङले चार वर्षदेखि स्कुलको साढे ४ करोड रुपैयाँ व्यक्तिगत बैंक खातामा राखी ब्याज खाइरहेको उजुरी परेपछि सशस्त्र मुख्यालयले छानबिन थालेको हो । 

स्रोतका अनुसार, सशस्त्र प्रहरी महानिरीक्षकको सचिवालयले बुधबार यस विषयमा उनीसँग सोधपुछसमेत गरेको थियो । स्कुलबाट घरायसी बिदा लिएर निस्किएकी उनलाई सशस्त्र प्रहरी महानिरीक्षकको सचिवालयमा लामै समय ‘केरकार’ गरिएको थियो ।

सशस्त्र प्रहरी कल्याणकारी कोषद्वारा सञ्चालित एपीएफ स्कुलकी लेखा अधिकृत गुरुङको यस्तो चरम बदमासीमा पनि कल्याणकारी कोषका एसपी राजकुमार लामिछाने किन मौन बस्दै आए ? गम्भीर प्रश्न खडा भएको छ । 

एपीएफ स्कुलका यसअघिका समादेशक सशस्त्र प्रहरी वरिष्ठ उपरीक्षक (हाल डीआईजी) दिगविजय सुवेदीको मिलेमतोमा राशनमा भ्रष्टाचार भएको भन्दै २०८२ साल मंसिर १४ गते राष्ट्रसेवकहरुको नाममा तत्कालीन गृहमन्त्रीलाई सम्बोधन गर्दै उजुरीसमेत परेको थियो । उजुरीको बोधार्थ सशस्त्र प्रहरी बल नेपाल, प्रधानमन्त्री कार्यालय, हेलो सरकार, अख्तियार दुरुपयोग अनुसन्धान आयोग र ट्रान्स्परेन्सी इन्टरनेसनल नेपाललाई दिइएको थियो । उजुरीमा ‘विद्यालयका विद्यार्थीहरूलाई प्रदान गरिने खाना (रासन) को गुणस्तर घटाएर कल्याण कोषबाट  छुट्याइएको रकमको दुरुपयोग गरिरहेको, यस कार्यबाट मेस सचिव÷क्वार्टरमास्टरको मिलेमतोमा दैनिक करिब २० हजार रुपैयाँ बचत गरी अनियमित रूपमा लाभ लिइरहेको उल्लेख थियो । उजुरीमा भनिएको थियो, ‘यो भनेको विद्यार्थीहरूको आधारभूत आवश्यकतामाथि गरिएको क्रूरता हो । विद्यालयको कल्याण कोषबाट उपलब्ध गराइने खाना बापतको रकम गुणस्तरहीन गरी यसरी व्यक्तिगत लाभका लागि प्रयोग गर्नु गम्भीर वित्तीय अनियमितता हो । यस घटनाको तत्काल छानबिन गरिनु आवश्यक छ ।’

यो उजुरीपछि पुसको दोस्रो साता सशस्त्र प्रहरीको कानुन निर्देशनालयले लेखा अधिकृत सशस्त्र प्रहरी निरीक्षक गुरुङ, मेस सचिव÷क्वार्टरमास्टरसँग बयानसमेत लिएको थियो । तर त्यसबेला कसैमाथि पनि कारबाही भएन । बरु तिनै समादेशक तत्कालीन एसएसपी सुवेदीलाई नम्बर ७ महेश्वरी बाहिनीको निमित्त बाहिनीपतिको जिम्मेवारी दिएर सरुवा गरियो । सुवेदी अहिले डीआईजी बढुवा भइसकेपछि पनि सोही बाहिनीमा कार्यरत छन् । बढुवापछि उनीसहितको डीआईजीको पदस्थापन भने भइसकेको छैन । माघ दोस्रो साता स्कुल छाडेर सुदूरपश्चिमतिर हिँडेका सुबेदीले त्यसपछिका दिनमा पनि आफूले पाउनु पर्ने रकम चाँडै पठाइदिन भन्दै बारम्बार लेखा अधिकृत गुरुङसहितलाई टेलिफोन सम्पर्क गर्ने गरेको स्रोतको दाबी छ । 

उता, अहिले लेखा अधिकृत गुरुङको बदमासी क्रमशः सार्वजनिक हुन थालेपछि एउटै व्यक्तिलाई साढे ६ वर्षदेखि लगातार किन राखियो भन्ने गम्भीर प्रश्न खडा भएको छ । अन्य लेखा प्रमुखलाई बढीमा दुई वर्ष एउटै कार्यालयमा राख्ने गरिएकोमा उनलाई कसको के स्वार्थमा वर्षाैंसम्म त्यहाँ राखियो ? यसको जवाफ कसले दिने ? 

तत्कालीन सशस्त्र प्रहरी महानिरीक्षक राजु अर्यालले आँखा चिम्लिँदा उनको स्कुल बसाइले निरन्तरता पाएको हो । ‘फलस्वरूप लेखा अधिकृत गुरुङको बदमासीको ग्राफ बढ्दै गयो,’ स्रोतले भन्यो । 

शैलेन्द्र खनाल सशस्त्र प्रहरी महानिरीक्षक (आईजीपी) हुँदा सो स्कुलको लेखा सम्हालेकी गुरुङ खनालपछि दुई जना आईजीपी परिवर्तन भएपनि त्यहीँ कार्यरत छिन् । खनालको पालामा दुई वर्ष लेखा प्रमुख भएकी गुरुङ निवर्तमान आईजीपी राजु अर्यालको चार वर्ष कार्यकाल सकिसकेपछि पनि त्यहीँ कार्यरत छिन् । 

सशस्त्र प्रहरी नायव निरीक्षक (सई) हुँदा एपीएफ स्कुलको लेखा सम्हालेकी गुरुङ अहिले सशस्त्र प्रहरी निरीक्षक छिन् ।

विगतमा कार्यदल र नम्बर २० गण सिनामंगलको समेत लेखा प्रमुखको जिम्मेवारी बहन गरिसकेकी गुरुङलाई लामो समयदेखि एउटै कार्यालय र काठमाडौं उपत्यकाभित्रै राखिएको भन्दै लेखा उपसमूहका अधिकृतहरू नै अचम्ममा पर्दै आएका छन् । 

लेखा समूहका एक अधिकृत भन्छन्, ‘हामीले चाहिँ पटक पटक काठमाडौं उपत्यका छाड्नुपर्ने, गुरुङले चाहिँ लगातार काठमाडौं, अनि एउटै कार्यालयमा ६–६ वर्षसम्म बस्न पाउनु पर्ने ?’

रोचक यो छ कि, सशस्त्र प्रहरीका जवानदेखि अधिकृतहरू एफपीयु मिसनमा आफ्नो पालो कहिले आउँछ भनेर कुरिरहेको बेला सशस्त्र प्रहरी निरीक्षक गुरुङ भने मिसनमा पनि आफ्नो नाम काटेर लेखा अधिकृतमै रमाइरहेकी छिन् । 

एपीएफ स्कुलकी लेखा अधिकृत गुरुङ बासुदेव ओली र सनतकुमार बस्नेत आईजीपी हुँदा केन्द्रीय लेखामा कार्यरत थिइन् । सशस्त्र प्रहरीमा भएको अनियमिततामा चार जना पूर्वआईजीपीलाई अख्तियारले मुद्दा चलाउँदा गुरुङको मुद्दालाई भने तामेलीमा राखिएको थियो ।

यो विषयमा लोकपथ डटकमले २०८२ साल मंसिर १६ गते नै समाचार प्रकाशित गरेको थियो ।

हेर्नुस् लिंक

सशस्त्रकी यी भाग्यमानी इन्सपेक्टर : जो ६ वर्षदेखि लगातार एउटै कार्यालयमा लेखा प्रमुख छिन्‌