काठमाडौं । प्रधानमन्त्री दैवी प्रकोप उद्धार कोषमा आर्थिक सहयोग जुट्ने क्रम जारी रहेको छ ।
प्रधानमन्त्री तथा मन्त्रिपरिषद्को कार्यालयका अनुसार शनिबार बिहान ९ बजेसम्म कोषको खातामा १३ अर्ब ५४ करोड ९ लाख ३ हजार ११७ रुपैयाँ मौज्दात रहेको छ ।
भदौ २६ गते साँझ ५ बजेपछि मात्रै कोषमा २८ करोड २० लाख १४ हजार ३६६ रुपैयाँ थपिएको कार्यालयले जनाएको छ । उक्त रकम कोषका लागि विभिन्न नौ वटा बैंकमा खोलिएका खातामा जम्मा भएको हो ।
सरकारले यसअघि कोषबाट बाढीपीडितको राहतका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत १ अर्ब रुपैयाँ निकासा गरिसकेको छ ।
यसैगरी, कोषका दुई वटा बैंकमा रहेका अमेरिकी डलर खातामा पनि सहयोग रकम बढिरहेको छ । भदौ २६ गते साँझ ५ बजेपछि ती खातामा १ लाख ५४ हजार ७७० अमेरिकी डलर थपिएको छ ।
थप रकमसहित डलर खातामा कुल २ करोड ३४ लाख ३८ हजार ८४७ अमेरिकी डलर पुगेको प्रधानमन्त्री तथा मन्त्रिपरिषद्को कार्यालयले जनाएको छ ।
यो खबर पढेर तपाईलाई कस्तो महसुस भयो ?
प्रतिक्रिया