आज यी तीन प्रदेशमा वर्षा र हिमपातको सम्भावना

काठमाडौं । हाल नेपालको पश्चिमी भूभागमा पश्चिमी न्यूनचापीय प्रणालीको आंशिक प्रभाव रहेको मौसम पूर्वानुमान महाशाखाले जनाएको छ। उक्त प्रणालीको प्रभावका कारण बागमती, गण्डकी, कर्णाली र सुदूरपश्चिम प्रदेशका पहाडी भूभागमा आंशिक बदली रहेको छ भने बाँकी भूभागमा मौसम मुख्यतया सफा छ।

महाशाखाका अनुसार आज दिउँसो देशका अधिकांश भागमा मौसम सामान्यतया सफा रहनेछ। तर कोशी, गण्डकी र कर्णाली प्रदेशका पहाडी भूभागका एक-दुई स्थानमा हल्का वर्षासहित हिमपात हुने सम्भावना रहेको छ।

आज राति कोशी र गण्डकी प्रदेशका पहाडी भूभागमा आंशिक बदली रहने र अन्य स्थानमा मौसम मुख्यतया सफा रहने पूर्वानुमान गरिएको छ।