पूराना दललाई रविको अपिल : ‘सबै दल मिलेर सहमतीय सरकार बनाउनुस्’

काठमाडौं । राष्ट्रिय स्वतन्त्र पार्टी (रास्वपा) का अध्यक्ष रवि लामिछानेले सबै पूराना दलहरुलाई मिलेर सहमतीय सरकार बनाउन आग्रह गरेका छन् ।

सामाजिक सञ्जालमा लेख्दै पूर्व उपप्रधानमन्त्री समेत रहेका लामिछानेले देशको व्याप्त बेथितिलाई ठिक पार्न अन्तिम अवसरका रुपमा लिन ४ वर्ष मिल्नका लागि सबै दलहरुलाई आग्रह समेत गरेका छन् ।

‘सम्पुर्ण पुराना दलहरुलाई अपिल । देशमा ब्याप्त बेथितिलाई ठिक गर्ने अन्तिम अवसरका रुपमा अब यो ४ वर्ष तपाईहरु सबै मिल्नुस्। देशका तमाम समस्या सुल्झाउन हामी बाहेकको सहमतिय सरकार बनाउनुस्। हामी प्रतिपक्षी मोर्चा सम्हाल्छौं। यो अवसरको सदुपयोग गरेर ३३ वर्षमा गरेका गलत काम सच्याउने हो कि मिलेमतो गरेर तिनलाई ढाक छोप गरी प्रमाण लुकाएर,थप अपराधीहरुलाई छुटाउने बचाउने हो त्यो तपाईंहरुको जिम्मा ।’ उनले भनेका छन् ।

त्यस्तै आफूूहरुले मिसन ८४ भन्दैगर्दा अन्य दलले पनि मिसन ८४ भनेको तर अन्य दलले यसअघिका अवसर सदुपयोग गर्न नसकेको टिप्पणी गरे । अन्य दलले ००७ देखि ०६२÷०६३ सालसम्मको अवसर सदुपयोग नगरेको बताए ।

‘तर “मिशन ८४“ भनेर तपाईंहरुले भनेको त फिटिक्कै सुहाएन। तपाईको लागि त मिशन ८० नै छ त! मिशन ०७ साल देखि निरन्तर मिशन नै मिशन थियो त !! केही नभए पनि मिशन ६३ देखि त अवसर नै अवसर थियो होला। अझ मिशन ८०,मिशन८१,मिशन८२, मिशन ८३ छदै छ त! यो ४ वर्ष सबै मिलेर यसरी काम गर्नुस् कि हामी जस्ता नयाँ,लोकरिझ्याई वाला, सिद्धान्त नभएका, आफ्नै सहिद नभएका दललाई पुरै असान्दर्भिक बनाइदिनुस्। ४÷४ वर्ष बाँकी छ, गर्नुस् काम र देखाइदिनुस् आफ्नो अपार क्षमता। जनताले तपाईहरुलाई यसरी भोट दिउन् कि हाम्रो जमानत जफत होस्। ४ वटा सहि निर्णयले मात्रै पनि मुलुकमा धेरै सुधार हुन सक्छ, तपाईंहरुसँग ४÷४ वर्ष छ। गर्नुस् निर्णय र देखाइदिनुस् हामी सबैलाई।
राजनितीको एउटा सटर त बन्द हुनै पर्छ हजुर!! कि तपाइको कि हाम्रो। ४ वर्ष अघि नै एड्भान्समा घण्टी बजाएर सचेत गराएको छु,सोच्नु होला ।’ उनले सामाजिक सञ्जालमा लेखेका छन् ।