एमालेकै सांसदलाई चित्त बुझेको छैन निरन्तरको संसदको अवरोध

काठमाडौं । प्रमुख प्रतिपक्षी दल नेकपा एमालेले विभिन्न मागसहित लामो समयदेखि प्रतिनिधिसभामा अवरोध गरिरहेको छ ।

गत भदौ २३ गतेदेखि एमाले छाडेर गएका १४ सांसदको कारबाही, सभामुखको राजीनामासहित माग गरेर एमालेले संसदमा निरन्तर अवरोध गरिरहेको छ । तर निरन्तर संसद अवरोध हुनु जनताको सार्वभौम अधिकार माथिको खेलवाड भएको केही सांसदहरु असन्तुष्ट देखिएको छन् ।

नेकपा(एमाले)का सांसद डा. भीमबहादुर रावलले निरन्तर संसद अवरोध हुनु जनताको सार्वभौम अधिकार माथिको खेलवाड भएको बताएका छन् ।

आइतबार प्रतिनिधि सभाको बैठकमा सहभागि हुन संसद भवन पुग्नुभएका सांसद रावलले सञ्चारकर्मीहरुसँग कुराकानी गर्दै निरन्तरको संसद अवरोध जनताको सार्वभौम अधिकार माथिको खेलवाड भएको बताएका हुन् ।

उनले संसद अवरोध गर्नु गैरजिम्मेवार काम भएको टिप्पणी गरे । सांसद रावलले देशको कार्यपालिका, व्यवस्थापिका र न्यायपालिका अलपत्र पारिएको भन्दै यस्तो गर्नु देशलाई कमजोर पार्ने सुनियोजित षड्यन्त्र भएको आशंका व्यक्त गरे ।

उनले भने– ‘यो त नेपाली जनताको जुन सार्वभौम अधिकार माथिको खेलवाड हो । र यो एकदम अत्यन्त गैरजिम्मेवार काम हो । किनभने नेपाली जनताले आफ्नो निर्वाचित जनप्रतिनिधि मार्फत् राष्ट्रको स्वाधिनता, स्वतन्त्रता, जनताको जिविका जस्ता महत्वपूर्ण विषयमा छलफल होला, त्यसले निकास देला भनेर उनीहरुले अपेक्षा गरेका हुन्छन् र संसद भनेको देशमा उत्पन्न समस्याहरुको निकास दिने महत्वपूर्ण थलो हो । तर जसरी खेलवाड गरिएको छ, देशको कार्यपालिका, व्यवस्थापिका संसद, न्यायपालिका सारा अलपत्र गर्ने काम जुन गरिएको छ यो मलाई लाग्छ नेपाल राष्ट्रलाई कमजोर बनाउने कतैबाट सुनियोजित खेल त भइराख्या छैन भन्ने कहिलेकाहीँ मनमा शंका लाग्छ ।’

अन्य सांसदहरु संसद अवरोध गरिरहे पनि रावल भने त्यसको विरोधमा उत्रिएको देखिँदैनन् । त्यसो त आफ्ना मागहरु पूरा नभएसँगै कुनै पनि संसदीय प्रक्रियामा भाग नलिने भन्ने पार्टीको नीतिविरुद्ध उनले संसदमा आफ्ना कुराहरु राखिरहेका छन् ।