काठमाडौँ–अख्तियार दुरुपयोग अनुसन्धान आयोगलले तीन करोड रुपियाँभन्दा बढी अवैध सम्पत्ति आर्जन गरेको अभियोगमा शहरी विकास तथा भवन निर्माण विभाग, डिभिजन कार्यालय रूपन्देहीका कार्यालय प्रमुख सुरेश ठाकुरविरुद्ध भ्रष्टाचारको मुद्दा दर्ता गरेको छ ।
ठाकुरले अवैधरूपमा तीन करोड १८ लाख ७३ हजार ७२० रुपियाँ आर्जन गरेको ठहर गर्दै आयोगले आइतबार रकम जफतको मागदावीसहित विशेष अदालत काठमाडौँमा आरोपपत्र दायर गरेको हो ।
प्रमुख ठाकुरले निर्माण व्यवसायीसँग विभिन्न बहानामा रकम माग गर्ने र रकम नदिएको खण्डमा अनावश्यक दुःख दिई आजित बनाएको तथा सार्वजनिक पदमा बहाल रहँदा आर्जन गरेको स्रोत नखुलेको सम्पत्ति सम्बन्धमा आयोगले अनुसन्धान गरेको थियो । आजको गोरखापत्र दैनिकले खबर छापेको छ ।
आयोगका प्रवक्ता रामेश्वर दंगालका अनुसार, सोही अवधिमा ठाकुर र उहाँका परिवारका सदस्यको चल अचल सम्पत्ति एवं शेयर लगानी, बीमा, बैङ्क मौज्दातमा तीन करोड ९३ लाख ७४ हजार ९२८ रुपियाँ देखिएको छ । ठाकुरको वैध आयभन्दा बढी तीन कारोड १८ लाख ७३ हजार ७२० रुपियाँ बराबरको सम्पत्तिको स्रोत नखुलेको पाइएको छ ।
यसका अतिरिक्त ठाकुरले सार्वजनिक सेवाको पदमा रहेर गैरकानूनी रूपमा आर्जन गरी, स्रोत पुष्टि हुन नसकेको सम्पत्ति उहाँकी श्रीमती अनिता ठाकुरको नाममा राखेको जानकारी पनि आयोगले दिएको छ ।
यो खबर पढेर तपाईलाई कस्तो महसुस भयो ?
प्रतिक्रिया