लगातार वर्षापछि विराटनगर र इटहरीका विद्यालय दुई दिन बन्द

विराटनगर । लगातार वर्षा हुन थालेपछि मोरङको विराटनगर महानगरपालिका र सुनसरीको इटहरी उपमहानगरपालिकाले दुई दिन विद्यालय बन्द गर्ने निर्णय गरेका छन् ।

जल तथा मौसम पूर्वानुमान विभागले आजदेखि ठूलो वर्षा हुने सूचना जारी गरेपछि विद्यालय बन्द गर्ने निर्णय गरिएको हो ।

विराटनगर महानगरपालिकाले असोज ८ र ९ गते विद्यालय बन्द गर्ने जनाएको छ । महानगरपालिकाका महाशाखा प्रमुख रामप्रसाद ढुंगेलका अनुसार लगातारको वर्षालाई ध्यानमा राख्दै दुई दिन विद्यालय बन्द गरिएको हो ।

यस्तै, इटहरी उपमहानगरपालिकाले पनि दुई दिन विद्यालयमा बिदा दिने निर्णय गरेको छ । गएरातिदेखि नै वर्षा हुन थालेपछि विद्यालय बन्द गर्ने निर्णय गरिएको उपमहानगरपालिकाले जनाएको छ ।

कोशी प्रदेशका अधिकांश जिल्लामा गएरातिदेखि लगातार वर्षा भइरहेको छ । वर्षाका कारण सम्भावित जोखिमलाई ध्यानमा राख्दै विद्यालय बन्द गरिएको स्थानीय तहहरूले जनाएका छन् ।