काठमाडौं । हिमालयन एभरेष्ट इन्स्योरेन्स लिमिटेडले नेपाल प्रिमियर लिग एनपीएलको तेस्रो सिजनका लागि चितवन राइनोजसँगको साझेदारीलाई निरन्तरता दिएको छ । योसँगै हिमालयन एभरेष्ट इन्स्योरेन्स र चितवन राइनोजबीच लगातार दोस्रो पटक सहकार्य भएको हो ।
हिमालयन एभरेष्ट इन्स्योरेन्स लिमिटेडको बबरमहलस्थित मुख्य कार्यालयमा आयोजित कार्यक्रममा कम्पनीकी प्रमुख कार्यकारी अधिकृत अञ्जु श्रेष्ठ र चितवन राइनोजका अध्यक्ष आयुष न्यौपानेले सम्झौतापत्रमा हस्ताक्षर गरेका हुन् ।
दशैंपछि सुरु हुने एनपिएलमा राइनोजको जर्सीमा हिमालयन एभरेष्ट इन्स्योरेन्सको लोगो हुनेछ । सम्झौता कार्यक्रममा हिमालयन एभरेष्ट इन्स्योरेन्सकी प्रमुख कार्यकारी अधिकृत श्रेष्ठले नेपाली क्रिकेटको लोकप्रियता र विकासमा निजी क्षेत्रको साझेदारी महत्वपूर्ण रहेको बताइन् । उनले टिमलाई सफलताको लागि अग्रिम शुभकामना पनि दिइन् ।
त्यस्तै, चितवन राइनोजका अध्यक्ष आयुष न्यौपानेले हिमालयन एभरेष्ट इन्स्योरेन्ससँगको सहकार्यलाई निरन्तरता दिन पाउँदा खुसी लागेको र आफ्नो टिमले उत्कृष्ट प्रदर्शन गर्ने लक्ष्य लिएको उल्लेख गरे ।
हिमालयन एभरेष्ट इन्स्योरेन्सले नेपाली खेलकुद तथा क्रिकेटको विकास र प्रवर्द्धनमा निजी क्षेत्रको सहभागिता आवश्यक रहेको विश्वास गर्दै विभिन्न खेल गतिविधिमा सहकार्य गर्दै आएको छ । चितवन राइनोजसँगको दोस्रो पटकको साझेदारीले कम्पनीको खेलकुद क्षेत्रप्रतिको प्रतिबद्धतालाई थप बलियो बनाउने अपेक्षा गरिएको छ ।
यो खबर पढेर तपाईलाई कस्तो महसुस भयो ?
प्रतिक्रिया