काठमाडौं । प्रमुख प्रतिपक्षी दल नेपाली कांग्रेसका सांसद अर्जुननरसिंह केसीले बाढी प्रभावित रसुवा र नुवाकोटका होल्डिङ सेन्टरमा रहेका नागरिकको सुरक्षा तथा अस्थायी पुनःस्थापनाको व्यवस्था गर्न सरकारसँग माग गरेका छन् ।
प्रतिनिधिसभाको शुक्रबारको बैठकमा बोल्दै सांसद केसीले होल्डिङ सेन्टरमा रहेका महिला, वृद्धवृद्धा तथा बालबालिका असुरक्षा र स्वास्थ्य जोखिममा रहेको भन्दै सरकारको ध्यानाकर्षण गराएका हुन् ।
उनले रसुवा, नुवाकोट र धादिङलगायत जिल्लामा आवतजावत पूर्णरूपमा विच्छेद भएकाले तत्काल वैकल्पिक यातायातको व्यवस्था गर्न पनि माग गरे ।
बेत्रावतीदेखि गल्छीसम्म सञ्चालनमा रहेका दुईवटा तुइनले मात्रै आवतजावतको समस्या समाधान नहुने भन्दै उनले कम्तीमा पाँचवटा बेलीब्रिज यथाशीघ्र निर्माण गर्न सरकारसँग आग्रह गरे ।
‘बाढीग्रस्त रसुवा तथा नुवाकोटका होल्डिङ सेन्टरमा रहेका पीडितहरू, खासगरी महिला, वृद्ध तथा बालबालिकाहरू अत्यन्त अप्ठ्यारो परिस्थितिमा छन् । उनीहरूलाई अझ बढी संरक्षण, सुरक्षा र व्यवस्थापनको आवश्यकता छ,’ उनले भने, ‘पीडितहरूलाई यथाशीघ्र सुरक्षित र अस्थायी पुनःस्थापना मिलाउन सरकारसँग जोडदार माग गर्दछु ।’
उनले बाढी प्रभावित क्षेत्रमा खोज तथा उद्धारको कार्यलाई थप प्रभावकारी बनाउन पनि सरकारसँग आग्रह गरे ।
यो खबर पढेर तपाईलाई कस्तो महसुस भयो ?
प्रतिक्रिया