हाम्रो माग पूरा नभए फागुन २१ मा निर्वाचन हुँदैन : दुर्गा प्रसाईँ

काठमाडौं । मेडिकल व्यवसायी दुर्गा प्रसाईँले आफूहरुले अघि सारेको माग पूरा नभए आगामी फागुन २१ मा निर्वाचन नहुने दाबी गरेका छन् ।

सोमबार साँझ प्रधानमन्त्री सुशीला कार्कीसँग भेटघाटपछि सञ्चारकर्मीहरुसँग कुरा गर्दै प्रसाईँले सो कुरा बताएका हुन् ।

उनले ०६२–०६३ को जनआन्दोलनको म्याण्डेट संघीयता र धर्म निरपेक्षता लगायतका मागहरु नरहेको भन्दै त्यस विषयमा जनमत संग्रह गर्न आग्रह गरे ।

‘आज हाम्रा माग प्रधानमन्त्री र गृहमन्त्रीले राम्रोसँग सुन्नुभयो । तपाईंका माग भनेका जनजीविकोपार्जन माग हुन् । यि मागहरु कम्युनिष्टले बोकेर हिँड्ने माग हुन् । तर कम्युनिष्टहरुले यही भर्‍याङ बनाएर अर्बौं रुपैयाँ कमाए । त्यो ठाउँमा म भए अहिले मुख्यसचिव बोलाएर भन्थेँ भनेँ । सबै कुरा अध्ययन गरेर, म छलफल गर्दछु र पुसको २ गते निर्णय दिन्छु । तपाईंहरुले भनेको जस्तै निर्णय दिन्छु भन्नुभएको छ । २०६२—०६३ को जनआन्दोलनको म्याण्डेट भनेको संघीयता, धर्मनिरपेक्षता ल्याउने थिएन । राजसंस्था फ्याँक्ने थिएन । कसरी भयो ? इँजार जहाँ गाँठो परेको हो त्यहीँ फुकाउनुपर्छ । चंगाको धागो चहाँ चुँडिएको हो त्यहीँ गाँस्नुपर्छ । चुनाव हुँदैन, आशै नगर्नु । उहाँलाई व्यवस्था ठिक छैन भनेँ । तपाईंले पनि नाती खेलाउने व्यवस्था ल्याउन जनमत संग्रहमा जाऔँ, यो व्यवस्था ठिक छ की छैन भनेर भनेको छु । सबै विषयमा जनमत संग्रहमा जाऔँ भनेको छु । उहाँले सही डिसिजन दिनुभएन भने चुनाव हुँदैन,’ उनले भने ।