काठमाडौं । संसदीय सुनुवाई समितिको सभापतिमा कांग्रेस सांसद रामहरि खतिवडा निर्विरोध निर्वाचित भएका छन् ।
यसअघि राज्य व्यवस्था तथा परामर्श समितिको सभापतिबाट राजीनामा दिएका रामहरिलाई संसदीय सुनुवाई समितिको सभापति बनाइएको हो ।
संघीय संसद सचिवालयका अनुसार खतिवडालाई सभापति बनाउन कांग्रेस प्रमुख सचेतक श्यामकुमार घिमिरेले प्रस्ताव गरेका थिए भने एमाले प्रमुख सचेतक महेश बर्तौलाले समर्थन गरेका थिए ।
संसद सचिवालयले रिक्त सभापति पदको निर्वाचनका लागि बुधबार सूचना प्रकाशित गरेको थियो । आज अपरान्ह ४ बजेसम्मको समय दिइएकोमा खतिवडाको मात्र उम्मेदवारी परेको थियो । त्यससँगै उनी निर्विरोध निर्वाचित भएका हुन् ।
यसअघिकी सभापति ईश्वरीदेवी न्यौपानेलाई राज्यव्यवस्था तथा सुशासन समितिको सभापति बनाइएको छ । निजामती सेवा विधेयकमा कुलिङ पिरियड हटाउन खतिवडाले भूमिका खेलेको भन्दै चौतर्फी आलोचना भएपछि राजीनामा दिएका थिए ।
त्यससँगै उनको ठाउँमा न्यौपानेलाई लगिएको थियो । यता न्यौपानेको ठाउँमा उनलाई ल्याइएको हो ।
यो खबर पढेर तपाईलाई कस्तो महसुस भयो ?
प्रतिक्रिया