सांसद पराजुलीको चेतावनी : ‘नेपालको भू-भागमा कुनै सम्झौता गर्दैनौँ’

काठमाडौं । राष्ट्रिय स्वतन्त्र पार्टीका सांसद गणेश पराजुलीले महाकाली नदी क्षेत्रका लिपुलेक, लिम्पियाधुरा र कालापानी नेपालको अविभाज्य भू–भाग भएकोमा आफ्नो दल दृढ रहेको बताएका छन् । 

प्रतिनिधि सभाको बैठकमा बोल्दै सांसद पराजुलीले चीन–भारत सहमतिबारे चीन भ्रमणअघि स्पष्ट पार्न र राष्ट्रियताको सन्दर्भमा साझा अवधारणा बनाउन सरकारसँग माग गरे ।

सांसद पराजुलीले १८१६ को सुगौली सन्धिबाट काली नदी नेपालको पश्चिमी सीमा भएको ऐतिहासिक तथ्य विवादको विषय बन्न नसक्ने उल्लेख गर्दै लिम्पियाधुरा काली नदीको उद्गमस्थल भएको र यही नदी नेपालको पश्चिमी सीमा भएको विभिन्न प्रमाणले पुष्टि गर्ने बताए ।

उनले नेपालकै प्रत्यक्ष सहभागिता र सहमतिबिना भारत र चीनबिच गरिएको कुनै पनि सम्झौता वैधानिक नहुने जिकिर गर्दै भने, ‘राष्ट्रको अखण्डता, सार्वभौमिकता र भौगोलिक स्वाधीनताको संरक्षणभन्दा ठूलो जिम्मेवारी कुनै पनि दल वा सरकारको हुन सक्दैन । नेपालको भू-भागमाथि अन्य राष्ट्रहरूले नेपालको प्रत्यक्ष सहभागिता र सहमतिबिना गर्ने कुनै सम्झौता वा गतिविधि वैधानिक हुँदैन र हुन सक्दैन ।’

सांसद पराजुलीले भारत र चीनबिच नेपाललाई सहभागी नगराई लिपुलेक मार्ग प्रयोग गर्न गरिएको समझदारी अन्तर्राष्ट्रिय कानुनको दृष्टिले अवैध रहेको भन्दै जनताले सरकारको मौनता प्रति प्रश्न उठाएको पनि उल्लेख गरे। उहाँले देशको सीमा विवाद समाधानका लागि कूटनीतिक पहल गर्न सरकारको ध्यानाकर्षण गराए ।