काठमाडौं । सञ्चार तथा सूचना प्रविधि मन्त्री पृथ्वी सुब्बा गुरुङले बैंक नोट बाहेक सुरक्षाका सबै सामग्री छाप्ने व्यवस्था नेपालमै सुरु भएको बताएका छन् ।
बुधबार गोरखापत्र दैनिकको १ सय २५औँ वार्षिकोत्सवको अवसरमा आयोजित विशेष कार्यक्रमलाई सम्बोधन गर्दै उनले यस्तो बताएका हुन् । उनले नोटबाहेकका सबै छपाईका सामग्री उत्पादन गर्न सक्ने प्रेसको व्यवस्था भइसकेको बताए ।
जनशक्ति र वित्तीय व्यवस्थापन गरी प्रेस सञ्चालनको तयारी भइरहेको उनको भनाइ छ । पासपोर्टलगायत सुरक्षाका कुनै पनि सामग्री छपाईका लागि अब विदेश जानु नपर्ने बताए ।
उनले भने, ‘बैंक नोटबाहेक सबै चिज उत्पादन गर्न सक्ने प्रिन्ट गर्न सक्ने प्रिन्टिङ प्रेसको प्रबन्ध भइसकेको छ । म्यान पावरको हिसाबले प्रबन्ध गरेर, वित्तीय व्यवस्थापन गरेर हामी त्यो काम गर्दैछौँ । अबदेखि यस्ता चिजहरू छाप्नका लागि विदेश जानुपर्दैन । त्यो काम मन्त्रालयले सुरु गरिसकेको छ ।’
मन्त्री गुरुङले चलचित्र विकास बोर्डको पुरानो ऐन विस्थापित गरेर नयाँ बनाउने प्रक्रिया सुरु गरेको बताए ।
उनले बोर्डको नयाँ ऐन दर्ता भइसकेकाले पास भएर छिट्टै सञ्चालनमा ल्याइने बताए । चलचित्र विकास बोर्डको आफ्नै स्वामित्वको भवन निर्माणको काम भइरहेको बताउँदै उनले चलचित्र क्षेत्रलाई उद्योगको रूपमा विकास गरी राजश्व आर्जनको महत्त्वपूर्ण क्षेत्र बनाउने उल्लेख गरे ।
उनले भने , ‘यो वर्षभित्र मन्त्रालयलाई धेरै कुरामा दुरुस्त बनाउँदै छौँ । चलचित्र विकास बोर्डको पुरानो ऐन थियो त्यसलाई हामीले दर्ता भइसक्या छ, त्यो पास हुन्छ । त्यसको यही वर्षदेखि बिल्डिङ बनाउने काम सुरु हुन्छ । आफ्नै स्टुडियो भवन हुन्छ । त्यसले चलचित्र विकासको क्षेत्रमा भएको अरू धेरै विकृतिहरूलाई हटाउँदै लगेका छौँ हामीले । र ठुलो राजश्व आर्जन गर्ने ठाउँमा पुगेका छौँ र इन्डस्ट्रिजलाई डेभलभ गर्ने कुरामा हाम्रो मन्त्रालय अघि बढी सकेको छ । कोमामा परेको थियो त्यो,मृत प्रायः थियो । भेन्टिलेटरमा राख्या थियो त्यहाँबाट निकालेर अहिले काम गर्ने ठाउँ बनाएको छौँ त्यसलाई ।’
सञ्चारमन्त्री गुरुङले जनताको हकहितलाई सुनिश्चित गर्ने राज्यको दायित्व भएकाले संघीय लोकतन्त्रान्त्रिक गणतन्त्रको मूल्य मान्यता बचाउनका लागि गोरखापत्रले महत्त्वपूर्ण भूमिका खेल्नुपर्नेमा जोड दिए ।
यो खबर पढेर तपाईलाई कस्तो महसुस भयो ?
प्रतिक्रिया