जलविद्युत आयोजनाको आईपीओ स्वीकृत गर्न सेबोनले बार्गेनिङ गरिरहको सांसद सापकोटाको आरोप

काठमाडौं । नेकपा (माओवादी केन्द्र)का सांसद माधव सापकोटाले धितो पत्र बोर्ड (सेबोन)ले जलविद्युत आयोजनासम्बन्धी आईपीओ स्वीकृत गर्न कमिसन मागिरहेको आरोप लगाएका छन् । 

बुधबारको संसद् बैठकमा बोल्दै सांसद सापकोटाले यस्तो आरोप लगाएका हुन् । उनले बोर्डले साना आयोजनासँग ५ प्रतिशत र ठुला आयोजनासँग ७ प्रतिशत कमिसनको बार्गेनिङ गरिरहेको उनको आरोप छ । 

उनले बोर्डले कमिसन मागिरहेकै कारण १००९.५२ मेगावाट क्षमताका ४३ जलविद्युत् आयोजनाका ८९ कम्पनीको ५६ अर्ब ७ करोड रुपैयाँभन्दा बढीको आईपीओ अनुमति २२ महिनादेखि रोकिएको उल्लेख गरे । 

उनले सरकारको २८ हजार मेगावाट जलविद्युत उत्पादनको लक्ष्य र बोर्डले गरिरहेको रवैयाबिच विरोधाभास रहेको उल्लेख गर्दै तत्काल छानबिनको माग गरे ।

उनले भने, ‘धितोपत्र बोर्डले साना परियोजनासँग ५ प्रतिशत र ठुला आयोजनासँग ७ प्रतिशत कमिसनको बार्गेनिङ गर्‍यो । यो निकै गम्भीर र दुःखदायी कुरा हो । म यसका लागि नेपाल सरकारको गम्भीर ध्यानाकर्षण गराउन चाहन्छु । सरकारको २८ हजार मेगावाट जलविद्युत उत्पादन गर्ने लक्ष्य छ, अर्कोतिर सरकारकै निकायहरूको यो प्रकारको रवैया छ ।’

उनले बोर्डले कमिसन मागिरहेको विषयमा छानबिन गर्न सरकारलाई रुलिङ गर्न सभामुखसँग आग्रह गरे ।