खुल्लामञ्चमाथि भूमाफियाको राज : अवैध रुपमा बनाइएको टहरा भत्काउन शुरु

लोकपथ संवाददाता

२०७६,बैशाख,१४,शनिवार ०७:४५

काठमाडौं । खुल्लामञ्चभित्र अवैध रुपमा बनाइएको टहरा भत्काइन शुरु गरिएको छ ।

टहरा काठमाडौं महानगरपालिकाका मेयर विद्यासुन्दर शाक्यको निर्देशनमा आज (शनिवार)बाट भत्काइन लागेको हो । पसल भत्काउनका लागि शनिबार नै डोजर परिचालन गरिएको छ ।

खुलामञ्च अतिक्रमण गरेर सटर बनाइएको भन्दै जनस्तरबाट व्यापक विरोध भएपछि काठमाडौं महानगरपालिकाले ती पसलमा डोजर चलाउने निर्णय गरेको हो ।

बिहीवार खुल्लामञ्चको अतिक्रमण रोक्न खुल्लामञ्च बचाउ अधिकार अभियानका अभियन्ताले आन्दोलन गरेका थिइ । उनीहरुले काठमाडौं महानगरपालिकासँगको ‘सेटिङ’मा खुल्लामञ् अतिक्रमण गरिएको भन्दै आक्रोशित भएका थिए ।

उता खुल्लामञ्चलाई जलेश्नर स्वच्छन्द बिकोइ बिल्डर्स नामक ठेकेदार कम्पनीले बिक्री गरेको पाइएको थियो । पाँच करोड अग्रीम भुक्तानी लिएर मनोजकुमार भेटवालको स्वच्छन्द बिल्डर्सले सार्वजनिक जग्गामा ४० वटा सटर निर्माण गरेको थियो । भेटवालले एउटा सटरबाट ११ लाख रुपैयाँ सलामी लिएर बिक्री गरेको पाइएको थियो ।