जनकपुरधाम । प्रदेश २ मा लगातार प्रश्नपत्र बाहिरिएपछि प्रदेश २ का आन्तरिक मामिला तथा कानूनमन्त्री ज्ञानेन्द्र यादवले संघीय सरकारका शिक्षामन्त्रीको राजीनामा माग गरेका छन् ।
यही चैत १० गतेबाट शुरु भएको माध्यमिक शिक्षा परीक्षा (एसईई) अन्तर्गत विज्ञान र सामाजिक विषयको प्रश्नपत्र आउट भएपछि प्रदेश कानूनमन्त्री यादवले संघीय सरकारका शिक्षामन्त्री गिरिराजमणि पोखरेलको राजीनामा मागेका हुन् ।
लगातार दुई दिन एसईई परीक्षाको प्रश्नपत्र बाहिरिएपछि मन्त्री यादवले असन्तुष्टि जनाएका हुन् ।
शुक्रवार पत्रकारहरुसँग कुरा गर्दै प्रदेशका गृहमन्त्री यादवले संघले षड्यन्त्रपूर्ण तरिकाले प्रदेश २ लाई बदनाम गराउन खोजेको समेत आरोप लगाएका छन् ।
यसअघि प्रदेश २ का मुख्यमन्त्री लालबाबुर राउतले लगातार प्रश्नपत्र आउट गराएर प्रदेश २ लाई सरकारले बदनाम गराउन खोजेको बताएका थिए । साथै उनले एसईई परीक्षाको प्रश्नपत्र बाहिरिएको घटनाको जिम्मेवारी केन्द्र सरकारले लिनुपर्ने समेत बताएका थिए ।
लगातार एसईई परीक्षा रद्द हुँदा विद्यार्थीहरु अन्योलमा परेका छन् ।
यो खबर पढेर तपाईलाई कस्तो महसुस भयो ?
प्रतिक्रिया