नेविसंघमा राजीनामाको लहर, संकटमा अध्यक्ष महर

काठमाडौं । नेपाल विद्यार्थी संघ (नेविसंघ) केन्द्रीय समितिका पदाधिकारीले धमाधम राजीनामा दिन थालेका छन् । 

संघको समयमै महाधिवेशन नभएको भन्दै सहमहामन्त्रीद्वय ललिता सुनार र हरिहर शर्माले राजीनामा दिएका छन् । यस्तै केन्द्रीय सदस्य कल्पना खड्का, सुनिता अधिकारी, भोला नेपाल, पम्फा गान्धारी, शारदा लामा, लिखितेन्द्र श्रेष्ठ, दीपेशराज भण्डारीलगायत ४५ जनाले राजीनामा दिएका छन् ।

उनीहरुले नेपाली काँग्रेसका वरिष्ठ नेता रामचन्द्र पौडेल समक्ष सामूहिक रुपमा राजीनामा पत्र बुझाएका हुन् । संघका अध्यक्ष नैनसिंह महरले महाधिवेशन नगरी आफ्नो पदावधि मात्र लम्ब्याएको, क्याम्पसमा सङ्गठन निर्माण गर्न नसकेकोलगायत आरोप उनीहरुले लगाएका छन् ।

‘जतिपटक म्याद थप गरे पनि महाधिवेशन गराउन नसक्ने ठान्दै सामूहिक राजीनामा दिएका हौँ,’ सहमहामन्त्री शर्माले भने । महर नेतृत्वबाट महाधिवेशन सम्भव नभएपछि वर्तमान कार्यसमितिको औचित्य र सान्दर्भिकता सकिएकाले राजीनामा दिनुपरेको शर्माले बताए ।

‘विधानअनुसार तदर्थ समिति गठन गरी महाधिवेशन गर्नुपर्छ,’ केन्द्रीय सदस्य कल्पना खड्काले भनिन् । यसअघि संघका नौ पदाधिकारीले राजीनामा दिएका थिए ।