काठमाडौं । सरकारले लामो समयदेखि रिक्त रहेको तीन कूटनीतिक नियोगमा राजदूत सिफारिस गरेको छ ।
आइतबार बसेको मन्त्रिपरिषद् बैठकले भारतका लागि निलम्बर आचार्य, यूएईका लागि कृष्णप्रसाद ढकाल र मलेसियाका लागि उदयराज पाण्डेलाई सिफारिस गर्ने निर्णय गरेको हो ।
भारतका तत्कालीन राजदूत दीपकुमार उपाध्यायले चुनाव लड्न पदबाट राजीनामा दिएपछि दिल्लीमा राजदूत खाली थियो ।
संविधानको मस्यौदाकारसमेत रहेका पूर्वकानूनमन्त्री आचार्य अढाई दशकअघि श्रीलंकाको राजदूत थिए भने पछिल्लो समय उनी नेपाल–भारत प्रबुद्ध व्यक्तिहरूको समूह (ईपीजी) का सदस्य थिए ।
त्यसैगरी यूएईका लागि सिफारिस ढकाल परराष्ट्रका सहसचिव हुन् । उनी भारतमा डेढ वर्ष कार्यवाहक थिए ।
सरकारले ६ महिनाअघि नै उदयराज पाण्डेलाई मलेसियाका लागि सिफारिस गर्ने निर्णय गरेको थियो ।
मलेसियाका लागि ६ महिना अघिनै सिफारिस गरिएको पाण्डेकै नाम आइतवार बसेको मन्त्रिपरिषद्को बैठकले अनुमोदन गरेको हो ।
पाण्डे यसअघि साउदी अरबका राजदूत थिए ।
उनीहरू तीनै जनामाथि संसदीय सुनुवाइ हुनेछ ।
संसदीय सुनुवाइ समितिले अनुमोदन गरेपछि मात्र राष्ट्रपतिले नियुक्त गर्ने संवैधानिक व्यवस्था छ ।
साथै मन्त्रिपरिषद् बैठकले जेनेभास्थित राष्ट्रसंघीय नियोगमा दीपक धितालको पदावधि थप्ने निर्णय पनि गरेको छ । उक्त निर्णयबारे सरकारले औपचारिक जानकारी भने दिएको छैन ।
यो खबर पढेर तपाईलाई कस्तो महसुस भयो ?
प्रतिक्रिया