अछाममा ७ वर्षीय बालिका बलात्कृत

अछाम । अछामको कमलबजार नगरपालिकामा ७ वर्षीया बालिका बलात्कृत भएकी छन्  । सोही नगरपालिकाको  अर्की १४ बर्षीया बालिकामाथि बलात्कार प्रयास भएको प्रहरीले जनाएको छ । 

दुवै घटनामा संलग्न भएको आरोपमा प्रहरीले कमलबजार–५ का एक १८ बर्षीय युवकलाई पक्राउ गरेको छ । उनलाई शनिबार साँझ अछाम प्रहरीले पक्राउ गरेको हो । तर उसको परिचय भने खुलाइएको छैन । पीडितको परिचय खुल्न सक्ने भएकाले उनको परिचय नखुलाइएको जिल्ला प्रहरी कार्यलयले जनाएको छ । 

गत ३ असोजमा गाई, बाख्रा चराउन गएकी ७ बर्षीया बालिकालाई जंगलमै ती युवकले बलात्कार गरेका हुन् । तर, २ कात्तिकमा पुनः जंगलमा गाई, बाख्रा चराउन गएकी अर्की १४ बर्षीया बालिकामाथि बलात्कारको प्रयास गरेपछि मात्र सो घटना सार्वजनिक भएको हो । 

बालिका भागेर  घरमा पुगेपछि घटना सार्वजनिक भएको थियो । त्यस व्यत्तिलाई पक्रउ गरे पछि अनुसन्धानको क्रममा अर्को घटना पनि खुल्लन आएको हो । 

आफ्नो छोरीलाई ती युवकले घडी दिइ फकाएर बलात्कार गरेको पीडितका बुवाले प्रहरीमा दिएको उजुरीमा उल्लेख छ । 

प्रहरी श्रोतका अनुसार पीडितलाई मार्ने धम्की दिई त्यो युवकले करणी  गरेका थिए । 

घटनामा संलग्न युवकलाई जिल्ला प्रहरी कार्यालयको हिरासतमा राखिएको छ ।