काठमाडौं– नेकपा एमाले र माओवादी केन्द्रबीच एकता प्रक्रियामा अन्योल उत्पन्न भएको भनिएको बेला ‘ब्रेक थ्रु’ को प्रयास भएको छ । नेकपा माओवादी केन्द्रका अध्यक्ष प्रचण्ड र एमाले नेता माधव नेपालबीच मंगलबार बिहान एकता प्रक्रियालाई निरन्तरता दिने विषयमा छलफल भएको हो ।
भेटमा भारतीय प्रधानमन्त्री नरेन्द्र मोदीको नेपाल भ्रमणको सेरोफेरोमा दुई पार्टीबीच देखिएको विवादका सम्बन्धमा छलफल भएको बताइएको छ ।
भेटका क्रममा एमाले नेता नेपालले ओली र प्रचण्डबीचमात्र वान टु वान वार्ता हुँदा पार्टी एकताबारे कार्यकर्ता प्रष्ट नहुने र अन्यौल बढ्ने भन्दै संयोजन समिति बैठकमा छलफल गर्न आग्रह गरेको बताइएको छ ।
यसरी सुरु भयो विवाद भारतीय प्रधानमन्त्री नरेन्द्र मोदीको नेपाल भ्रमणअघि माओवादी केन्द्रका अध्यक्ष प्रचण्डप्रति लक्षित गर्दै ओलीले गरेको ट्वीटपछि दुई नेताबीच सम्बन्धमा चिसोपन सुरु भएको बताइएको छ । ओलीको ट्वीटपछि प्रचण्डले पार्टीको बैठकमा ओलीको ट्वीटप्रति असन्तुष्टि जनाएका थिए । सोलगत्तै विवाद सतहमा आएको विवाद हालसम्म पनि ज्यूँका त्यू रहेको बेला नेपाल र प्रचण्डबीच भेटवार्ता भएको हो ।
मोदीले थप तनाव
मोदीको भ्रमणका सम्बन्धमा प्रधानमन्त्रीले नेकपा माओवादी केन्द्रसँग कुनै छलफल नगरेको, भारतसँग अरुण तेस्रोको सम्झौतामा विभागिय मन्त्रीलाई नसमेटेको लगायतका विषयमा माओवादी एमाले र प्रधानमन्त्री ओलीसँग थप असन्तुष्ट बनेको बताइएको छ ।
सोमबार मात्रै संसद बैठकमा बोल्दै माओवादी प्रवक्ता तथा सांसद पम्फा भुसालले भारतसाग भएको अरुण तेस्रोसम्बन्धी सम्झौता संविधान विपरित भएको बताएकी थिइन् । यसबाहेक पार्टी एकताका सन्दर्भमा पनि भागबण्डा, एजेण्डाका साथै चुनाव चिन्ह र झण्डालगायतका विषयमा पनि विवाद भएको छ ।
दुई पार्टीबीच विवाद बढेसँगै जेठमा हुने भनिएको एकता लगभग टरेको बताइन थालिएको छ । यसअघि पनि दुई पटक एकताको मिति सरिसकेको थियो ।
यो खबर पढेर तपाईलाई कस्तो महसुस भयो ?
प्रतिक्रिया