‘सिरी ए’ फुटबल : जितसँगै मिलान शीर्ष स्थानमा

काठमाडौं । इटालियन सिरी ए फुटबलमा एसी मिलानले सहज जित हात पारेको छ । शनिबार राति भएको खेलमा मिलानले बोलोग्नालाई ४-२ गोल अन्तरले पराजित गरेको हो ।

राफेल लियोले १६ औं मिनेटमा गोल गर्दै मिलानलाई सुरुआती अग्रता दिलाएका थिए । खेलको २० औं मिनेटमा एडमा सौमारोले रातो कार्ड पाएपछि बोलोग्ना १० खेलाडीमा समेटियो ।

३५ औं मिनेटमा डाभिड कालाब्रियाले गोल गर्दै मिलानलाई २-० को अग्रता दिलाए । खेलको ४९ औं मिनेटमा ज्लाटन इब्राहिमोबीचले आत्मघाती गोल गरेपछि खेल २-१ को स्थितिमा पुग्यो ।

५२ औं मिनेटमा बोलोग्नाका मुसा बार्रोले गोल गरेपछि खेल २-२ को स्थितिमा पुग्यो । खेलको ५८ औं मिनेटमा रोबर्टो सोरियानोले रातो कार्ड पाएपछि बोलोग्ना ९ खेलाडीमा समेटिएको थियो ।

खेलको ८४ औं मिनेटमा स्माइलले गोल गर्दै मिलानलाई ३-२ को अग्रता दिलाए ।  खेलको ९० औं मिनेटमा इब्राहिमोबीचले गोल गर्दै मिलानलाई ४-२ को जित दिलाए ।

जितसँगै मिलानले ९ खेलमा २५ अंक जोड्दै मिलान अंक तालिकाको शीर्ष स्थानमा उक्लिएको छ । बोलोग्ना १२ अंक जोडेर ९ औं स्थानमा रहेको छ ।