काठमाडौं । परराष्ट्रमन्त्री प्रदीप ज्ञवालीले सगरमाथाको उत्तरतर्फ चीन रहेकोले सगरमाथाको उचाई मापनको काम नेपाल र चीनका प्राविधिकहरुले संयुक्त रुपमा गरेको बताएका छन् ।
मंगलबार काठमाडौंमा सगरमाथाको उचाई सार्वजनिक कार्यक्रममा बोल्दै मन्त्री ज्ञवालीले चिनियाँ प्राविधिक टोलीसँग सहकार्य गरेर सर्वस्वीकार्य रुपमा सगरमाथाको उचाई सार्वजनिक गरिएको बताए ।
सर्वोच्च शिखर सगरमाथाको नयाँ उचाइ सार्वजनिक भएको छ । नापी विभागमा आयोजित पत्रकार सम्मेलनमा परराष्ट्रमन्त्री प्रदिप ज्ञवालीले नेपाल र चीन दुवै देशका लागि संयुक्त रुपमा सगरमाथाको नयाँ उचाइ घोषणा गरेका हुन् ।
८६ सेन्टिमिटरको वृद्धिपश्चात् अहिले सगरमाथाको उचाइ ८८४८.८६ मि पुगेको ज्ञवालीले बताए ।
कार्यक्रममा बोल्दै ज्ञवालीले सगरमाथाको नयाँ उचाइ संयुक्त रुपमा घोषणा गर्ने भनेर अघिल्लो वर्ष सहमति भएको बताए ।
‘यस्तो महत्वपूर्ण समारोहमा सहभागी हुन पाउँदा अत्यन्तै खुशी र सम्मानित महशुस गरेको छु,’ ज्ञवाली अगाडि थप्छन्, ‘यो दुवै देशका लागि विशेष समारोह हो ।’
साथै उनले सम्बन्धित मापन टोलीहरुले महिनौं लामो सर्वे तथा मापन प्रक्रिया पूरा गरेर र प्राविधिक समूहले उपलब्ध तथ्याङ्कलाई संयुक्त रुपमा प्रशोधन गरी निकालेको सगरमाथाको नयाँ उचाइमा दुवै राष्ट्रले सहमति जनाइसकेको पनि बताए । यसो भन्दै परराष्ट्रमन्त्री ज्ञवालीले सम्मेलनमा राष्ट्रपति विद्यादेवी भण्डारीले पठाएको सन्देश पढेका थिए ।
सन्देश पढिसकेपछि उनले सगरमाथाको नयाँ उचाइ सार्वजनिक गरेका थिए । सगरमाथाको उचाइ अहिले ८८४८.८६ मि पुगेको छ । अबदेखि यही उचाइलाई आधिकारिक मानिने छ । यसअघि सर्वे अफ इण्डियाले सन् १९५४ मा सगरमाथाको उचाइ ८८४८ मिटर मापन गरेको थियो जसलाई हामी अहिलेसम्म आधिकारिक मान्दै आएका थियौं ।
नेपालले आफै सगरमाथाको उचाइ मापन गरेको यो इतिहासमै पहिलो पटक हो । उत्तरका हिमालहरु नेपाल चीन मित्रताका प्रतिक रहेकाले पनि संयुक्त रुपमा मापन गरिएको मन्त्री ज्ञवालीको भनाई छ ।
सगरमाथाको उचाइ सार्वजनिकरण समारोह : राष्ट्रपति भण्डारीले के पठाएकी थिइन् सन्देश ?
यो खबर पढेर तपाईलाई कस्तो महसुस भयो ?
प्रतिक्रिया