कोरोनाको आशंकामा कान्ति बाल अस्पतालमा तीन बालक ‘आइसोलेसनमा’

लोकपथ संवाददाता

२०७६,चैत्र,१०,सोमवार १८:५०

काठमाडौं – कान्ति बाल अस्पतालमा कोरोनाको आशंकामा तीन जना बालकलाई भर्ना गरिएको छ ।
आइतबार एक जना र सोमबार दुई जना गरी तीनजना बालकहरु कान्ति बाल अस्पतालको आइसोलेसनमा उपचारत रहेको स्रोतले बतायो ।

उनीहरुको परिवारले जनाएअनुसार आइतबार भर्ना भएका बालकको बुबा दुबईबाट नेपाल आएका थिए । आइतबार भर्ना भएका दुई बालकमध्ये एकजनाको काका चाइनाबाट आएको र अर्को एक बालकको बुबा कतारबाट आएका थिए । उनीहरुको उमेर क्रमश १४ महिना, ४ वर्ष र साढे ४ वर्ष छ । उनीहरुका अभिभावक ति ३ नै देश कोरोनाको प्रभावित देशहरु हुन् । बालकहरु उनीहरुसँग सम्पर्कमा रहेपछि बालकहरुमा कोरोनाको लक्षण देखिएकोले परिवारले उपचारका लागि अस्पताल ल्याएका हुन् ।

तीन जना बालकहरु आइसोलेसनमा उपचार गरिरहेको अस्पतालले जनाएको छ । अभिभावक कोरोना प्रभावित देशबाट स्वदेश फर्किएको १४ दिन पुगेको थिएन । अस्पतालले उनीहरुको अभिभावकको पनि नमुना जाँचको प्रयास गर्दैछ । उनीहरुको सम्पर्कमा रहेका बालकहरुमा कोरोनाको लक्षण देखिएको भन्दै परिवारले उनीहरुलाई अस्पताल लगेको थियो । तर ति बालकको रिर्पोट आइसकेको छैन ।

विश्वकै निमित्त ठूलो स्वास्थ्य चुनौती बनेको कोरोना भाइरसका कारण अहिलेसम्म १४ हजार ९ सय २५ जनाको मृत्यु भइसकेको छ । त्यस्तै, ३ लाख ४५ हजार २८९ जनालाई संक्रमण भएको छ । ९९ हजार ७८ जना निको भएर घर फर्किएका छन् । अहिलेसम्म १९२ देशमा संक्रमण फैलिएको छ ।
नेपालमा पनि उच्च सर्तकता अपनाइएको छ ।