काठमाडौं । स्मार्टफोन निर्माता कम्पनी मोटोरोलाले आफ्नो नयाँ प्रिमियम स्मार्टफोन ‘मोटोरोला सिग्नेचर २७’ भारतीय बजारमा सार्वजनिक गरेको छ ।
कम्पनीले गएको बिहीबार सार्वजनिक गरेको यस फोनमा २०० मेगापिक्सेलको क्यामेरा, ७००० एमएएच क्षमताको ब्याट्री र गुगलको जेमिनी एआई सुविधा समावेश गरेको छ ।
कम्पनीले यसलाई हालसम्मकै उन्नत स्मार्टफोनका रूपमा प्रस्तुत गरेको छ । फोनमा १०० गुणासम्म जुम गर्न सकिने क्यामेरा, उच्च गुणस्तरको डिस्प्ले र सात वर्षसम्म अपरेटिङ सिस्टम अपग्रेडको सुविधा दिइएको छ ।
यसको प्रारम्भिक मूल्य १ हजार ५९९ अमेरिकी डलर तोकिएको छ । आगामी केही महिनाभित्र विश्व बजारमा उपलब्ध गराउने कम्पनीको तयारी छ ।
चारवटा क्यामेरा, १०० गुणासम्म जुम
मोटोरोला सिग्नेचर २७ मा चारवटा क्यामेरा छन् । यसमा ५० मेगापिक्सेलको मुख्य क्यामेरा, २०० मेगापिक्सेलको पेरिस्कोप टेलिफोटो क्यामेरा, ५० मेगापिक्सेलको अल्ट्रावाइड क्यामेरा र ५० मेगापिक्सेलको फ्रन्ट क्यामेरा राखिएको छ ।
यसको २०० मेगापिक्सेल क्यामेराले १०० गुणासम्म जुम गर्न सक्छ। यसबाट टाढाका वस्तु तथा दृश्यको पनि तस्बिर खिच्न सकिने कम्पनीको दाबी छ ।
त्यस्तै, मुख्य क्यामेरामा सोनीको विशेष सेन्सर प्रयोग गरिएको छ । यसले कम उज्यालो भएको ठाउँमा पनि राम्रो फोटो र भिडियो खिच्न सहयोग गर्छ। फोनले डल्बी भिजन भिडियो रेकर्डिङलाई समेत समर्थन गर्छ ।
१२ हजार निट्स ब्राइटनेसको डिस्प्ले
यस स्मार्टफोनमा १.५ के रिजोल्युसन भएको एमोलेड डिस्प्ले दिइएको छ । यसको अधिकतम ब्राइटनेस १२ हजार निट्ससम्म पुग्ने कम्पनीले जनाएको छ ।
यसले घाम लागेको ठाउँमा पनि स्क्रिनमा देखिने सामग्री स्पष्ट रूपमा हेर्न सकिनेछ । कम्पनीका अनुसार नयाँ डिस्प्लेले परम्परागत एमोलेड प्यानलको तुलनामा ३४ प्रतिशत कम ऊर्जा खपत गर्छ ।
फोनमा क्वालकमको स्न्यापड्र्यागन ८ एलिट एक्सट्रिम जेन ६ प्रोसेसर प्रयोग गरिएको छ । लामो समय गेम खेल्दा वा धेरै काम गर्दा फोन तात्न नदिन विशेष कुलिङ सिस्टम पनि राखिएको छ ।
जेमिनी एआईका नयाँ सुविधा
मोटोरोला सिग्नेचर २७ मा गुगलको जेमिनी एआईका विभिन्न सुविधा उपलब्ध छन् । यसले प्रयोगकर्तालाई लेखन, भिडियो निर्माण तथा सम्पादनमा सहयोग गर्नेछ ।
फोनमा रहेको ‘र्याम्ब्लर’ सुविधाले बोलेका कुरालाई व्यवस्थित लेखमा बदल्न सक्छ । त्यस्तै, ‘साइन टु टेक्स्ट’ सुविधाले साङ्केतिक भाषालाई अंग्रेजी लिखित भाषामा अनुवाद गर्न सक्ने कम्पनीको दाबी छ ।
यसका अतिरिक्त जेमिनी ओम्नी र लिरिया सुविधामार्फत भिडियो सिर्जना, सम्पादन तथा साउन्डट्र्याक बनाउन सकिनेछ ।
७००० एमएएच ब्याट्री र फास्ट चार्जिङ
फोनमा ७००० एमएएच क्षमताको ब्याट्री दिइएको छ। यसले ९० वाटको तारयुक्त र ५० वाटको वायरलेस चार्जिङ सुविधा समर्थन गर्छ ।
कम्पनीका अनुसार १२ मिनेट चार्ज गर्दा पनि दिनभर प्रयोग गर्न पुग्ने ब्याट्री ब्याकअप प्राप्त गर्न सकिन्छ। यसको ब्याट्री अघिल्लो पुस्ताको तुलनामा ३५ प्रतिशत ठूलो रहेको बताइएको छ ।
अडियोका लागि यसमा बेङ एन्ड ओलुफसेनको प्रविधि प्रयोग गरिएको छ। साथै, फोनलाई धुलो र पानीबाट जोगाउन आईपी६८ र आईपी६९ रेटिङ दिइएको छ ।
सात वर्षसम्म अपरेटिङ सिस्टम अपडेट
मोटोरोलाले यस फोनमा सुरक्षा र गोपनीयतालाई पनि प्राथमिकता दिएको जनाएको छ । यसमा ग्राफिनओएस समर्थनका साथै सात वर्षसम्म अपरेटिङ सिस्टम अपग्रेड उपलब्ध गराउने बताइएको छ ।
फोनमा गोरिल्ला ग्लास सेरामिक ३ र एयरोस्पेस ग्रेड एल्युमिनियम फ्रेम प्रयोग गरिएको छ । यसले फोनलाई थप बलियो र टिकाउ बनाउने कम्पनीको दाबी छ।
नेपाली बजारमा साढे २ लाखभन्दा बढी पर्न सक्ने
मोटोरोलाले आगामी केही महिनाभित्र यो स्मार्टफोन विश्व बजारमा उपलब्ध गराउने जनाएको छ । भारतीय बजारमा यसको मूल्य र बिक्री सुरु हुने मिति भने सार्वजनिक गरिएको छैन ।
भारतीय बजारमा बिक्री सुरु भएपछि नेपाली बजारमा पनि यो फोन आउने सम्भावना छ । यसको अन्तर्राष्ट्रिय मूल्यका आधारमा नेपाली बजारमा साढे २ लाख रुपैयाँभन्दा बढी पर्न सक्ने अनुमान गरिएको छ ।
महँगो मूल्यका कारण नेपाली बजारमा यो स्मार्टफोन सीमित ग्राहकको रोजाइमा पर्ने देखिन्छ ।
यो खबर पढेर तपाईलाई कस्तो महसुस भयो ?
प्रतिक्रिया