गरिब भगाउने नीति लिएको भन्दै सरकारविरुद्ध सांसदहरूको आक्रोश

काठमाडौं । प्रतिनिधि सभाका सांसदहरूले गरिब भगाउने नीति लिएको भन्दै सरकारको आलोचना गरेका छन् ।

सांसदहरू विष्णुमाया विक, शम्भुप्रसाद ढकाल, नीति घतानीलगायतले मंगलबार बसेको प्रतिनिधि सभा बैठकमा आकस्मिक समय लिएर बोल्दै सरकारले कमजोर र पछाडि पारिएका नागरिकविरुद्ध नै डोजर लगायतका आतंक फैल्याएको भन्दै आपत्ति जनाएका हुन् ।

सांसद विकले सरकारले गरिबको बस्तीमा डोजर आतंक फैल्याएर शतप्रतिशत गलत गरेको आरोप लगाएकी छन् । उनले सरकारले सुकुमबासीहरुलाई तत्काल सान्त्वना दिने गरी सम्बोधन गर्नुपर्ने माग गरेकी छन् ।

सांसद विकले भनिन्,‘काठमाडौंबाट गरिब भगाउने जुन नीति सरकारले लिएको छ । यो सतप्रतिशत गलत छ । गरिब होइन, गरिबी भगाउने नीति सरकारको हुनुपर्दछ । आज डोजर आतंकले् दशैभरीका सुकुमबासी आन्दोलित छन् । उनीहरूलाई सान्त्वना दिन सरकारको तर्फबाट सम्बोधन गर्न म अनुरोध गर्न चाहन्छु । अब देशले द्वन्द्व होइन, शान्ति खोजिरहेको छ । त्यसैले सरकार शान्ति स्थापनाका लागि तयार होस भनी अनुरोध गर्दछु ।’

सांसद शम्भुप्रसाद ढकालले देशमा आत्महत्याको घटना बढिरहेकोमा चिन्ता व्यक्त गर्दै पीडितलाई न्याय हुने गरी अनुसन्धानको कामलाई अघि बढाउन सरकारलाई सचेत गराएका छन् । उनले दोषीलाई दण्डित गर्ने र पीडितलाई न्याय दिने गरी सरकारले त्यस्ता घटनाको अनुसन्धानको विषयलाई संवेदनशील रूपमा लिनुपर्ने समेत स्मरण गराए ।

सांसद ढकालले भने,‘हिजो बेलुकी विराटनगरको एक बैंकमा कार्यरत पीताम्बर खड्काले आत्महत्या गरे । आत्महत्या गर्नु अघि उनले ४ जना सिनियर, एक जना सहकर्मीको फोटो राखेर मलाई आत्माहत्या गर्न यिनैले बाध्य पारेका हुन भनेका छन् । वैदेशिक रोजगारीमा रहेका सुनसरीका एक युवकसँग झापा कन्काई ५ की एक युवतीको प्रेम भयो । युवक नेपाल आएपछि युवतिका परिवारले विवाहको प्रस्ताव लिएर घर गए । केटा पक्षले मोटरसाइकलसहित १० लाख रुपैयाँ पैसाको अफर गरे । युवतीले आफ्नो प्रेम असफल भएको ठानेर आत्महत्या गरिन । यस्ता केशहरूमा सम्बन्धित निकायले बिना दबाब अनुसन्धान गरोस । दोषीमाथि कडा कारबाही होस् ।’

सांसदहरूले दलित समुदायमाथि हुने विभेद अन्त्य हुने गरी आवश्यक कदम चाल्न सरकारलाई सचेत गराए । देशका विभिन्न भागमा दलितमाथि अन्याय हुने काम भइरहेको उल्लेख गर्दै त्यस्ता घटना हुन नदिन पनि सरकारले विशेष अभियान नै सञ्चालन गर्न आवश्यक रहेको बताए ।

सांसद घतानीले भनिन्,‘दलित समुदायमाथि वर्षौदेखि थोपरिएको निषेध, विभेद र बहिष्कारविरुद्ध समाजमा उठेको प्रश्न हो । यो राज्यमा दलितमाथि अझै पनि किन विभेद छ भन्ने प्रश्न पनि छ । हामीले संविधानमा समानता, दलितकालागि न्यायको विषय राख्यौँ । छुवाछुत मुक्त राष्ट्र घोषणा पनि गर्‍यौ । तर व्यवहारमा अझै पनि अवस्था फरक देखिन्छ । काठमाडौंमा पढ्न आएका एक युवकलाई घरबेटीले जात थाहा पाएपछि डेराबाट निकालिदिएका छन् । दलित समुदायलाई सम्मानपूर्वक व्यवहार हुने अवस्था सृजना गर्न म सरकारसँग माग गर्दछु ।’

सांसद घतानीले समाजमा दलित समुदायमाथि हुने विभेदको अन्त्य गर्न सरकारले विशेष निगरानी गर्न आवश्यक रहेको बताइन् ।