मकवानपुर । बागमती प्रदेशका मुख्यमन्त्री बहादुरसिंह लामाले चाडपर्वको संरक्षण गरिने बताएका छन् ।
आज नेपाल माझी उत्थान संघ केन्द्रीय समितिले मुख्यमन्त्री तथा मन्त्रिपरिषद्को कार्यालयमा माझी जातिको प्रमुख चाडका रूपमा रहेको लदी (कोसी) पूजाको दिन सार्वजनिक बिदा माग गर्दै ज्ञापनपत्र बुझाउन आएको टोलीसँग उनले सबै भाषा धर्म र चाडपर्वको आफ्नै महत्त्व रहेको बताए।
उनले यहाँ बसोबास गर्ने विभिन्न जातजातिहरूमध्ये माझी जातिको छुट्टै भाषा, धर्म र संस्कार संस्कृति भएको उल्लेख गर्दै बिदाको सन्दर्भमा सल्लाह गरेर निर्णय गर्ने प्रतिबद्धता व्यक्त गरे । प्रत्येक वर्षको फागुनको साइली मंगलबार पर्ने लदि (कोसी) पूजा यस वर्ष आगामी फागुन २० गते पर्न गएको छ ।
नेपाल माझी उत्थान संघ केन्द्रीय अध्यक्ष चिनीमाया माझी नेतृत्वको टोलीले ज्ञापनपत्र बुझाएको थियो । अध्यक्ष माझीले मुख्यमन्त्री लामालाई ज्ञापनपत्र बुझाउँदै देश संघीय संरचनामा रहेको सन्दर्भमा प्रदेश सरकारले माझी समुदायको मागलाई सम्बोधन गरिदिन अनुरोध गरे ।
राष्ट्रिय जनगणना २०७८ को तथ्याङ्कअनुसार नेपालमा एक लाख एघार हजार ३५२ जनसङ्ख्या माझीहरूको रहेको छ । नेपालमा रहेका माझीहरूको कुल जनसङ्ख्यामध्ये सबैभन्दा बढी बागमती प्रदेशमा मात्र ४१ हजार ६७१ अर्थात् कुल जनसङ्ख्याको ३७.४२ प्रतिशत रहेको विज्ञप्तिमा उल्लेख छ ।
यो खबर पढेर तपाईलाई कस्तो महसुस भयो ?
प्रतिक्रिया