काठमाडौं– प्रधानमन्त्री केपी शर्मा ओलीले आज गरेको मन्त्रिपरिषद् विस्तारमा जनता समाजवादी पार्टी (जसपा) का नेता राजकिशोर यादव उद्योग वाणिज्य तथा आपूर्ति मन्त्री बनेका छन् ।
यही जेठ ७ गते दोस्रो पटक प्रतिनिधि सभा विघटन गरेका ओलीले त्यसपछि मन्त्रिपरिषद् विस्तार गरेका पनि यो दोस्रो पटक हो । जेठ २१ गते मन्त्रिपरिषद् विस्तार गरेका ओलीले १ हप्तापछि फेरि मन्त्रिमण्डल विस्तार गरेका हुन् । आज गरिएको मन्त्रिपरिषद् विस्तारमा जसपाका नेता राजकिशोर उद्योग वाणिज्य तथा आपूर्ति मन्त्री बनेका हुन् । जेठ २१ गते जसपाका १० जना मन्त्री हुँदा यादव भने छुटेका थिए । जसपामा आन्तरिक कलह चर्किदै गएको अवस्थामा यादव शुरुमा पार्टी एकताको पक्षमा थिए । तर उनको अडान टिक्न सकेन । अध्यक्ष महन्थ ठाकुर पक्षले पार्टीमा आफ्नो समूहमा बहुमत पुरयाएर अर्का अध्यक्ष उपेन्द्र यादवलाई कारवाही गर्नका लागि सहज होस भनेर राजकिशोरलाई मन्त्री बनाएको हो । जसपाका अध्यक्षद्वय ठाकुर र यादवले एक अर्कालाई पार्टीबाट निष्काशन गरेपछि यो विवाद निर्वाचन आयोगमा पुगेको छ ।
अध्यक्ष यादवले ठाकुरलाई केन्द्रीय कार्यकारिणी समितिको बहुमत सदस्यको हस्ताक्षर सहित कारवाही गरिएको पत्र आयोगमा बुझाएका छन् । तर ठाकुर पक्षले आफ्नो समूहमा बहुमत जुटाउन सकेको छैन् । आयोगले अध्यक्ष ठाकुरलाइ पनि अध्यक्ष यादवलाई कारवाही गरिएको बारे केन्द्रीय कार्यकारिणी समितिका सदस्यको हस्ताक्षर सहित पत्र बुझाउन भनेको छ । तर ठाकुर पक्षले अझै बुझाउन सकेको छैन । त्यसका लागि ठाकुर पक्षले आयोगसँग मागेको एक हप्ताको म्याद भोली सकिँदैछ । यस अघि दुवै तर्फ हस्ताक्षर नगरेका राजकिशोर अब महन्थ पक्षमा लागेका छन् ।
त्यसकारण प्रधानमन्त्री ओलीले पनि ठाकुर पक्षलाई सहयोग गर्न उनलाई मन्त्री बनाएका जसपाकै एक नेताको भनाई छ । तत्कालीन राजपा हुँदा ६ जना अध्यक्ष मध्येमा एक जना राजकिशोर पनि निए । राजकिशोर पहिलो संविधान सभा निर्वाचनमा मधेसी जनाअधिकार फोरमबाट सिरहाबाट प्रत्यक्ष निर्वाचित भएका थिए । बाबुराम भट्टराई प्रधानमन्त्री भएका बेला राजकिशोर संचार तथा सूचना प्रविधि मन्त्री बनेका थिए । तर २०७० मा भएको दोस्रो संविधान सभा निर्वाचनमा उनी पराजित भएका थिए ।
२०७४ सालको प्रतिनिधि सभा निर्वाचनमा उनी सिरहा क्षेत्र नम्बर ४ बाट प्रत्यक्ष निर्वाचित भएका थिए । राजकिशोरले प्रधानमन्त्री ओलीले दोस्रोपटक प्रतिनिधि सभा विघटन गरेर असंम्वैधानिक कदम चालेको भन्दै आइरहेका थिए । तर उनी आजै मन्त्री बने ।दुवैतिर हस्ताक्षर नगरेर पार्टी एकताका लागि लागेका भनिएका राजकिशोर जसपाका सबैलाई चकित पार्दै मन्त्री बनेका एक नेताले बताए ।
यो पनि
को हुन् गृहमन्त्री बनेका खगराज अधिकारी ?
नेपाल समूह छोडेका पहाडीलाई मन्त्री पद पुरस्कार
फेरि वन मन्त्रालय सुदूरपश्चिमतिरै पुग्यो !
श्रीमान गृहमन्त्रीबाट हटेपछि श्रीमतीलाई सञ्चारमन्त्रीको जिम्मेवारी
यो खबर पढेर तपाईलाई कस्तो महसुस भयो ?
प्रतिक्रिया