धनगढी । सशस्त्र प्रहरी महानिरीक्षक नारायणदत्त पौडेलले सीमा सुरक्षालाई थप प्रभावकारी बनाउन क्रमशः सीमालाई डिजिटल प्रणालीमा लैजाने तयारी भइरहेको बताएका छन् । सुदूरपश्चिम प्रदेशको भ्रमणमा रहेका महानिरीक्षक पौडेलले सशस्त्र प्रहरी बल सीमा सुरक्षामा अग्रपंक्तिमा खटिएको उल्लेख गर्दै सो कुरा बताएका हुन् ।
सशस्त्र प्रहरी बल, नेपाल नं ३४ गण धनगढीमा आज मंगलबार आयोजित कार्यक्रममा उनले प्रदेशका प्रदेश कार्यालय प्रमुख सशस्त्र प्रहरी नायब महानिरीक्षक दिगविजय सुवेदी, नौवटै जिल्लाका सशस्त्र प्रहरी कार्यालय प्रमुख, कैलाली र कञ्चनपुरका सीमा सुरक्षा गुल्म, बीओपी र बेसका प्रमुखलगायतलाई सरकारको नीति तथा निर्देशनअनुसार काम गर्न पनि निर्देशन दिएका छन् ।
महानिरीक्षक पौडेलले सशस्त्र प्रहरी बलबारे नागरिकबाट गुनासो नआउने गरी दत्तचित्त भएर जिम्मेवारी निर्वाह गर्न आग्रह गरे । उनले आर्थिक सुशासन, भ्रष्टाचार नियन्त्रण, मानवअधिकार संरक्षण र लैंगिक समानतालाई आधार मानी सीमा क्षेत्रबाट हुने सीमा अपराध, अवैध चोरी–पैठारी तथा निकासी नियन्त्रणमा प्रभावकारी भूमिका निर्वाह गर्न निर्देशन दिए । साथै नेपाल सरकारको भ्रष्टाचारप्रति शून्य सहनशीलताको नीति अक्षरशः पालना गर्न आग्रह गरे ।
पछिल्लो समय युवा वर्ग लागुऔषधको कुलतमा फस्दै गएको र त्यसले समाजमा अन्य अपराधसमेत बढाउन सक्ने भन्दै महानिरीक्षक पौडेलले लागूऔषधको ओसारपसार नियन्त्रणका लागि सशक्त रूपमा परिचालन हुन निर्देशन दिए ।
महानिरीक्षक पौडेलले सशस्त्र प्रहरी कर्मचारीलाई ड्युटीमा खटिँदा इमानदारिता, सक्रियता र व्यावसायिकता प्रदर्शन गर्न निर्देशन दिँदै नीति, नियम, कानुन तथा आचारसंहिता उल्लंघन गर्ने कर्मचारीमाथि कडा कारबाही गरिने बताए । यसैगरी उनले मौसमी विपद्बाट हुनसक्ने धनजनको क्षति न्यूनीकरणका लागि आम नागरिकसँग २४सै घण्टा समन्वय र सम्पर्कमा रहन तथा विपद्को अवस्थामा आवश्यक सामग्रीसहित तत्काल परिचालन हुन पनि निर्देशन दिए ।
महानिरीक्षक पौडेलले कैलालीका प्रमुख जिल्ला अधिकारी हिरालाल रेग्मीलगायत जिल्ला सुरक्षा समितिका पदाधिकारीसँग जिल्लाको वर्तमान सुरक्षा अवस्था तथा सुरक्षा व्यवस्थापनका विषयमा समेत छलफल गरेका थिए ।
यसअघि उनले आज बिहान कैलालीको गौरीफन्टा नाकाको निरीक्षण गरी वस्तुस्थितिबारे जानकारी लिएका थिए । निरीक्षणका क्रममा महानिरीक्षक पौडेलले सीमा सुरक्षाको संवेदनशीलतालाई ध्यानमा राख्दै सीमासम्बन्धी समस्या, अपराध नियन्त्रण तथा नागरिकको सुरक्षाका विषयमा आफूहरू गम्भीर रहेको बताएका थिए ।
महानिरीक्षक पौडेलले सोमबार सुदूरपश्चिम प्रदेशस्थित सशस्त्र प्रहरी बल, नेपाल वैद्यनाथ वाहिनी मुख्यालय अत्तरिया, कैलाली तथा कैलालीको सीमावर्ती क्षेत्रमा रहेका विभिन्न सीमा सुरक्षा गुल्म तथा नाकाको अनुगमन तथा निरीक्षण गरेका थिए ।
उनले सीमानाकामा क्रियाशील सरकारी तथा गैरसरकारी संघसंस्थाका प्रतिनिधिसँग अन्तरक्रिया गरी सीमा सुरक्षाको अवस्थाबारे जानकारी लिएको सशस्त्र प्रहरी बल, नेपाल नं ३४ गण धनगढीका प्रमुख सशस्त्र प्रहरी उपरीक्षक खुमबहादुर केसीले जानकारी दिए ।
यो खबर पढेर तपाईलाई कस्तो महसुस भयो ?
प्रतिक्रिया