कर्णालीका मुख्यमन्त्रीको जिकिर : ‘तीनबुँदे सहमतिअनुसार मन्त्रिपरिषद् विस्तार’

सुर्खेत । कर्णाली प्रदेशका मुख्यमन्त्री मंगलबहादुर शाहीले एमाले र नेपाली कम्युनिस्ट पार्टी (नेकपा) बीच भएको सहमतिअनुसार चाँडै मन्त्रिपरिषद् विस्तार हुने बताएका छन् ।

नेकपाबाट मुख्यमन्त्री बनेका शाहीले मन्त्रिपरिषद् विस्तारबारे प्रदेशमा छलफल जारी रहेको र सहमतिको चरणमा आफूहरू पुगेको जिकिर गरे । उनले केही दिनमा मन्त्रिपरिषद्ले पूर्णता पाउने दाबीसमेत गरे ।

सातै प्रदेशमा तीनबुँदे सहमतिअनुसार दुवै दल एमाले र नेकपा अघि बढ्नुपर्ने भएकाले मन्त्रिपरिषद् विस्तारमा केही समय लागेको उनको भनाइ छ ।

मन्त्रिपरिषद् विस्तारमा केही समय लागे पनि सरकारी काम नरोकिएको उनले बताए ।

एमालेको समर्थनमा उनी यही साउन १२ गते मुख्यमन्त्री नियुक्त भएका थिए ।