काठमाडौं । नेपाली कांग्रेसका सभापति गगनकुमार थापाले सरकारलाई बहुमतको आडमा कानूनलाई राजनीतिक हतियारका रूपमा प्रयोग नगर्न सरकारलाई चेतावनी दिएका छन् ।
आइतबार पार्टी केन्द्रीय कार्यालयमा केन्द्रीय नीति, अनुसन्धान तथा प्रशिक्षण प्रतिष्ठानले आयोजना गरेको कार्यक्रममा बोल्दै सभापति थापाले यस्तो चेतावनी दिएका हुन् ।
उनले पार्टीका सांसदहरुलाई ‘कानूनको शासन’ र ‘कानूनद्वारा शासन’बिचको भेद छुट्याई सोहीअनुसार प्रस्तुत हुन आग्रह गरे ।
उनले सरकारले मुलुकको आर्थिक रुपान्तरणका लागि प्रभावकारी काम गरे कांग्रेसको सहयोग रहने तर संविधान र कानून कार्यान्वयको सवालमा कुनै सम्झौता गर्न नसकिने बताए ।
उनले वि.सं. २०४८ सालजस्तै अनुकूल राजनीतिक वातावरण र वि.सं. २०१५ सालजस्तै जनसमर्थन प्राप्त भएको अवस्थामा सरकारले मुलुकको बृहत्तर हित हुनेगरी परिणाम निकाल्नुपर्नेमा जोड दिए ।
उनले कानून निर्माण र मुलुक सञ्चालनको क्रममा सबैलाई सहभागि गराउनुपर्ने उल्लेख गर्दै सरकारले आफू संविधानभित्रै रहेर बनेको कुरामा हेक्का राख्नुपर्ने तर्क गरे ।
उनले सरकारले संवैधानिक मर्यादा र विधिको शासनलाई बेवास्ता गरे नेपाली कांग्रेस नाफा–घाटाको हिसाब नगरी त्यसविरुद्ध उभिने स्पष्ट पारे ।
उनले भने, ‘वि.स. २०४८ सालको जस्तो अनुकुलता भएको र वि.स. २०१५ सालको जस्तो जनसमर्थन प्राप्त गरेको सन्दर्भमा अर्थमन्त्रीज्यूले भनेको जस्तो मुलुकमा आर्थिक रुपान्तरण होस् भन्ने हाम्रो अपेक्षा छ । सरकार यो विषयमा ठिक ढंगले काम गर्दा हाम्रो समर्थन पनि रहन्छ । तर एउटा कुरा चाँही मैले यो सरकारलाई सम्झाउनुपर्छ ‘ड्यू प्रोसेस अफ ल’, ‘रुल अफ ल’ र रुल बाइ ल’ यो ती वटा कुरा हाम्रो साथीहरुले पनि याद गर्नुहोला । र यो कुरा हामीले सरकारलाई पनि याद दिलाउनुपर्नेछ । किनभने सरकार अहिले आउने र पाँच वर्षसम्म रहने मात्रै होइन । संसदीय प्रक्रियामा त सरकार जहिल्यै बहुमतमा हुन्छ । सरकारले मजाले संसदको बहुमतबाट कानून बनाउनसक्छ । त्यो कानून बनाउँदै गर्दा कानूनसम्मत भएको छ कि छैन । अर्को कुरा, विधिको शासन हो कि विधिले शासन हो ? कानूनलाई आफ्नो फाइदाका निम्ति र हतियारको रुपमा प्रयोग गर्ने हुनु हुँदैन । म संविधानभित्र छु, संविधानको परिधिभित्र छु, संविधानभन्दा माथि छैन, कानून बनाउने प्रक्रियामा सबैलाई सहभागि गराउनु्पर्छ, सर्वोत्तम हितका निमित्त कानूनको प्रयोग गर्ने हो भन्ने कुरामा सरकारले हेक्का राख्नैपर्छ । जहाँ हेक्का राख्दैन त्यहाँ नेपाली कांग्रेस उभिएर बोल्नुपर्छ । यसमा नाफा घाटा हेर्ने कुरा छैन । हामी अनावश्यक रुपमा बखेडा पनि नझिकौँ जुन झिकेका छैनौँ ।’
उनले सरकारले ल्याएको अगामी आर्थिक वर्षको बजेटले मध्यम र न्यून आय भएका वर्गलाई कुनैपनि किसिमको राहत दिन नसकेको स्पष्ट पारे । आयकरको सीमा हटाएर बाहिरबाट मध्यम आय भएका नागरिकलाई राहत दिएजस्तो गरेपछि पछाडिबाट करको भार बढाएको उनको टिप्पणी छ ।
यो खबर पढेर तपाईलाई कस्तो महसुस भयो ?
प्रतिक्रिया