काठमाडौं । आईसीसी महिला टी–२० विश्वकप ग्लोबल छनोटको आफ्नो पहिलो खेलमा नेपाल थाइल्यान्डसँग पराजित भएको छ ।
काठमाडौंमा आज आइतबारदेखि सुरु भएको कीर्तिपुरस्थित त्रिवि क्रिकेट मैदानमा भएको खेलमा नेपाल थाइल्यान्डसँग ८ विकेटले पराजित भएको हो ।
नेपालले दिएको १२३ रनको लक्ष्य थाइल्यान्डले १६.५ ओभरमा २ विकेटको क्षतिमा पूरा ग¥यो ।
थाइल्यान्डका लागि नथाकन चन्थमले अविजित ५७ रन बनाइन् । नानपत कोन्चारोन्काईले ३२ तथा अफिसरा सुवानचोनराथीले २८ रन बनाइन् । नेपालका लागि दुवै विकेट सीता रानामगरले लिइन् ।
त्यसअघि टस हारेर पहिले ब्याटिङ गरेको नेपालले २० ओभरमा अलआउट हुँदै १२२ रन बनाएको थियो ।
पावर प्लेमा उत्कृष्ट सुरुवात गरेको नेपाली राष्ट्रिय क्रिकेट टोलीले पछि भने सोचेजस्तो खेल खेल्न नसक्दा कमजोर लक्ष्य प्रस्तुत गरेको थियो । नेपालले ५.४ ओभरमा ५२ रन बनाएको थियो ।
ओपनर सम्झना खड्का ११ बलमा ६ चौकाको सहयोगमा २६ रन बनाएर क्याच आउट भएकी थिइन् । यस्तै, अर्की ओपनर विन्दु रावल ४४ रनमा आउट भएकी थिइन् । ५६ बलमा ६ चौका प्रहार गरेकी विन्दुको यो अन्तर्राष्ट्रिय क्रिकेटमा सर्वाधिक रन हो । उनी आउट भएपछि नेपालको खेलको लय बिग्रन पुगेको थियो ।
यस्तै, रुविना क्षेत्रीले १० बलमा २ छक्का र १ चौका प्रहार गरी १७ रन बनाउँदै पेभेलियन फर्किएकी थिइन् । पूजा महतो १२ रन, इन्दु बर्मा ६ रनमा क्याच आउट हुँदा कविता कुँवर २ रनमा रनआउट हुन पुगेकी थिइन् । यस्तै, सीता रानामगर शून्य रनमा नै आउट हुँदा रिया शर्मा ४ र सुमन विष्ट शून्य रनमा नै आउट भएकी थिइन् । काजल श्रेष्ठ भने २ रनमा अविजित रहेकी थिइन् ।
थाइल्यान्डका लागि थिपात्चा पुथावङवले ४ ओभरमा १५ रन दिएर ४ विकेट लिएकी थिइन् । ओनिचा काम्चोम्फुले २ तथा सुनिदा चतारंगरतना, सुलिपर्न लाओमी र चनिदा सुथिराङले १–१ विकेट लिएका थिए ।
नेपालले अब दोस्रो खेलमा बिहीबार नेदरल्यान्ड्ससँग खेल्ने छ ।
यो खबर पढेर तपाईलाई कस्तो महसुस भयो ?
प्रतिक्रिया