कैलालीका वरिष्ठ वन अधिकृत यादवविरुद्ध विशेष अदालतमा मुद्दा दायर

काठमाडौं । अख्तियार दुरुपयोग अनुसन्धान आयोगले डिभिजन वन कार्यालय कैलालीका वरिष्ठ वन अधिकृत पूर्णशंकर यादवविरुद्ध विशेष अदालतमा मुद्दा दायर गरेको छ ।

यादवमाथि कैलालीको चुरे गाउँपालिका–६ स्थित ग्वासी सामुदायिक वनको घाटगद्दी गरेको काठको बिमार्का र छोडपुर्जीका लागि सेवाग्राहीसँग सात लाख ३१ हजार रुपैयाँ घुस लिएको अभियोग लागेको छ । अख्तियारले यादवविरुद्ध बिगोबमोजिम कारबाहीको माग गर्दै मुद्दा दायर गरेको प्रवक्ता राजेन्द्रकुमार पौडेलले जानकारी दिए ।

यस्तै, बाटोको विवाद विषयको निर्णय गर्दा आफ्नो पक्षमा पार्नका लागि रविनकुमार श्रेष्ठले दुई लाख रुपैयाँ घुस दिएको भन्ने आरोपमा पोखरा महानगरपालिकाका तत्कालीन न्यायिक समिति सदस्य एवं सोही महानगर–९ का वडा सदस्य भावना श्रेष्ठविरुद्ध पनि मुद्दा दायर गरिएको छ ।

न्यायिक समितिमा विचाराधीन रहेको बाटोको विवादमा घुस दिन खोज्ने रविनकुमार र न्यायिक समिति सदस्य श्रेष्ठविरुद्ध बिगोबमोजिम कारबाहीको माग गर्दै सोमबार मुद्दा दायर गरिएको आयोगले जनाएको छ ।