पोखरा । हेलिकप्टर दुर्घटनामा परि निधन भएका संस्कृति, पर्यटन तथा नागरिक उड्डयनमन्त्री रवीन्द्र अधिकारीको पार्थिव शरीरमा श्रीमती र छोराहरुले दागवत्ती दिएका छन् ।
उनको राजकीय सम्मानका साथ गृहनगर पोखरामा अन्त्येष्टि गरिएको हो ।
पोखराको रामघाटमा उनको पार्थिव शरीरमा श्रीमती विद्या भट्टराई, छोराहरु विराज र स्वराज अधिकारीले दागवत्ति दिए ।
पोखरा प्रदर्शनीस्थलमा श्रद्धाञ्जली सभापछि रामघाटसम्म शवयात्रा गरिएको थियो । नयाँबजार, महेन्द्रपुल रानीपौवा, हस्पिटल चोक हुँदै रामघाटसम्मको शवयात्रामा सयौं सर्वसाधारण सहभागी भएका थिए ।
अधिकारीको शव आजै काठमाडौंबाट पोखरा लगिएको थियो ।
अधिकारीको काजकिरिया ७ दिनमा सक्ने परिवारको तयारी छ ।
उनको काजकिरिया पोखरा मालेपाटनस्थित घरमा हुनेछ ।
यसैगरी आजै काठमाडौंको पशुपति आर्यघाटमा पाँच जनाको दाहसंस्कार गरिएको छ ।
पशुपतिमा नेपाल नागरिक उड्ययन प्राधिकरणका उपमहानिर्देशक वीरेन्द्र श्रेष्ठ, प्रधानमन्त्री कार्यालयका उपसचिव युवराज दाहाल, मन्त्री अधिकारीका पीएसओ अर्जुन घिमिरे र पाइलट प्रभाकर केसीको दाहसंस्कार गरिएको हो ।
साथै यति एयरलाइन्स कम्पनीका प्रबन्ध निर्देशक आङ्ग छिरिङ्ग शेर्पाको शव पनि उनकै गृहनगर लगिएको छ ।
यो खबर पढेर तपाईलाई कस्तो महसुस भयो ?
प्रतिक्रिया