ललितपुर महानगरले ल्यायाे ६ अर्ब ३५ करोड ३५ लाखकाे बजेट

काठमाडौं । ललितपुर महानगरपालिकाले आर्थिक वर्ष २०७९/०८०काे लागि ६ अर्ब ३५ करोड ३५ लाखकाे बजेट ल्याएको छ । मेयर चिरिबाबु महर्जनले आगामी आर्थिक वर्ष २०७९/०८०का लागि नगरसभामा बजेट प्रस्तुत गरेका हुन्।

ललितपुर महानगरपालिकाले ‘डा.सत्यमोहन जोशी एकेडेमी’ स्थापना गर्ने र नगरपालिका क्षेत्रभित्र सामुदायिक पुस्तकालय स्थापनामा जोड दिँदै संघसंस्थाको सहकार्यमा एकेडेमी खोल्ने घोषणा गरेकाे छ । त्यस्तै बालकुमारीस्थित पर्यटकीय बसपार्क सञ्चालनमा ल्याउने भएको छ।

ललितपुर महानगरपालिकाले महानगर क्षेत्र भित्रको जग्गा र बागमती करिडोर क्षेत्रको पुनः नापी गर्ने भएको छ भने कल सेन्टरसमेत सञ्चालनमा ल्याउने भएको छ । यस विषयलाई बजेटमा पनि समावेश गरिएकाे छ ।

यस्तै महानगरपालिकाबाट कालोपत्रे भएको भएका सडकहरु कम्तीमा २ वर्षसम्म खन्न स्वीकृति नदिने भएकाे छ। साथै उपभोक्ता समितिबाट निर्माण कार्य गराउँदा विश्व सम्पदा सूचीकाबाहेक अन्य सबै योजनामा लागत जनसहभागिता १० प्रतिशत अनिवार्य गरिने नीतिमा लिएकाे छ।