गठबन्धनलाई आगामी निर्वाचनमा पानीमुनि गएपनि नछाडने ओलीको चेतावनी

काठमाडौं । प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले सरकारको आयू बढिमा एक वर्षमात्रै रहेको दावी गरेका छन् ।

अध्यक्ष ओलीले अव एक वर्ष भित्र संघीय संसदको चुनाव हुने र चुनावपछि यो सरकार हटने बताएका हुन् । शनिबार भक्तपुरको सुर्य विनायकमा आयोजित एक कार्यक्रममा बोल्दै उनले सत्तारुढ पाँच दलीय गठबन्धनलाई स्वार्थी भन्दै उनीहरुलाई आगामी निर्वाचनमा पानीमा गएपनि आफ्नो पार्टीले नछाडने चेतावनी दिए ।

अध्यक्ष ओलीले प्रचण्ड र माधवकुमार नेपाल नेतृत्वको पार्टीमा गएकाहरुलाई एमालेमै फर्कन आह्वान गरे । प्रचण्ड र नेपालले झुक्याएर पार्टीको सदस्यता दिएकाहरुलाई पार्टीमा आउन र राष्ट्र निर्माणको अभियानमा सहभागी हुन ओलीको आग्रह छ ।

उनले भने, ‘अव एक वर्ष भित्र चुनाव हुनै पर्छ । बच्ला कहाँ पानीमुनि गएपनि यो स्वार्थी गठबन्धन । यो कहाँ बच्छ रु बच्न सक्दैन । त्यसकारण अव त बढिमा एक वर्ष हो यिनको आयू । संसारभरीका जोतिषीलाई एकैठाउँमा राखेर सोध्यो भने पनि त्यही भन्छ –बढिमा एक वर्ष हो, आयू । यो सरकारको आयू । त्यसो भएर अहिले म धेरै समय नलिऊ । अहिले पूर्वतिर मेला लाग्थ्यो । एक थरी उरन्डेउलाहरु हुल बाँधेर जान्थे । अनि लुकाएर सिन्दुरचाँही खल्तीमा हालेर जुम्सो जस्तो भएर जाने । अनि राम्री केटी देखेपछि छ्वास्स टाउँकोमा सिन्दुर र्‍याकि दिएर गुटुट भाग्ने । के भो, के भो भन्दाभन्दै उहाँ पुगिसक्यो । माईतीहरु सिन्दुर हालीहाल्यो खोजेर सिन्दुर लाउने कहिले माकुनले सिन्धुर हालि दिएको छ झुक्याएर ,। कहिले प्रचण्डले झुक्याएर छ्वास्स हालिदिएको छ, सिन्दुर । कहिले काँग्रेसले हालि दिएको छ । आजको जवानामा पनि त्यस्तो कुरामा भर परेर हुन्छ ? हामी माईतीहरु सिन्दुर कसले हाल्यो भनेर खोजेर चेलीलाई जिम्मा लगाउने होईन । आउनुस, तिनीहरुले झुक्याएर हालिदिएका सिन्दुरहरु छोडिदिनुस । यहाँ आउनुस लक सावनले नुहाउनुस । नेकपा एमालेका आउनुस, देश बनाउने अभियानमा लागौं ।’

अध्यक्ष ओलीले निर्वाचनमा प्रशासनको दूरुपयोग गरे त्यसको प्रतिवाद गरेर अघि बढन आफ्नो पार्टी सक्षम रहेको दावी समेत गरे । उनले निर्वाचनमा जनताको मतलाई खोस्न नदिने गरी अघि बढन पार्टीका नेता, कार्यकर्तालाई निर्देशन समेत दिए ।

अध्यक्ष ओलीले वर्तमान सरकारले जनतालाई झुक्याउने काम मात्रै गरिरहेको आरोप पनि लगाए ।