जसपामा सांसद तानातान : ठाकुर र महतोले गराए खाली कागजमा सही

काठमाडौ–प्रधानमन्त्री केपी शर्मा ओली सरकारलाई जोगाउने कि हटाउने भन्ने विवाद चर्किएका बेला जनता समाजवादी पार्टीका दुबै पक्ष आ–आफ्ना तर्फ बहुमत जुटाउन लागेका छन् ।

अध्यक्ष उपेन्द्र यादव पक्षले आफूहरुसँग पार्टीको बहुमत कार्यकारिणी सदस्य र सांसद रहेको दाबी गरेपछि अध्यक्ष महन्थ ठाकुर पक्षले पनि कार्यकारिणी सदस्य र सांसदहरुलाई खाली कागजमा हस्ताक्षर गराएका छन् । ठाकुर पक्ष ओली सरकार हटाउनु हुदैन भन्ने पक्षमा छ भने यादव पक्ष ओलीले प्रतिनिधि सभा विघटनको असंवैधानिक कदम चालेको भन्दै कुनै पनि हालतमा ओलीलाई समर्थन गर्नु हुँदैन भन्ने पक्षमा छ ।

कति छन त जसपामा कार्यकारिणी सदस्य र सांसद ?

जसपामा कार्यकारिणी सदस्य ५१ जना छन् भने प्रतिनिधि सभामा सांसद संख्या ३४ छ । ३४ मध्ये २ जना सांसद निलम्वनमा परेका छन् । यादव र ठाकुर पक्षले कार्यकारिणी सदस्य र सांसद आ–आफ्नो पक्षमा बहुमत रहेको दाबी गरेका छन् । ठाकुर पक्षको कार्यकारिणी सदस्य संख्या यकिन भएको छैन । तर यादव पक्षले पार्टी हित विपरित काम गरेको भन्दै लुम्विनी प्रदेश सभाका ४ जना सांसदलाई बहुमतका आधारमा पदबाट हटाइसकेको छ । त्यसकारण अहिलेको अवस्थामा कार्यकारिणी समितिका यादव पक्षको बहुमत देखिएकोछ । फेरि सोमबार ठाकुर पक्षले खाली कागजमा गराएको हस्ताक्षरमा आफ्नो पक्षमा बहुमत रहेको दाबी गरेको छ । उता सांसद पनि आफ्नो पक्षमा निलम्बनमा परेका बाहेक १८ जना रहेका यादव पक्षको दाबी छ । यसमा अरु केही सांसद आफूतिर थपिने यादव पक्षको अनुमान छ । जसपमा पूर्व राजपा पक्षका सांसदले समेत ठाकुरलाई सहयोग नगर्ने पूर्व राजपाका एक नेताको भनाई छ । तर राजनीति हो यसै भन्न सक्ने अवस्था भने छैन । जसपाका एक नेता भन्छन् आफूलाई समर्थन गर्ने भएपछि प्रधानमन्त्री ओलीले पनि ठाकुर पक्षमा बहुमत पुर्‍याउन  सहयोग गर्नेछन् । त्यो भनेको सांसद किनबेच वा सत्ताको प्रलोभन हो ।

पूर्व राजपाभित्रै असन्तुष्टि

अध्यक्ष ठाकुरले पार्टी कार्यालय बबरमहलमा बोलाएर सोमबार प्रयोजन नखुलाई खाली कागजमा हस्ताक्षर गराएको भन्दै पूर्व राजपा पक्षका कार्यकारिणी सदस्य र सांसदहरुले असन्तुष्टि जनाएका छन् । जुनसुकै बेला पनि आवश्यक कदम चाल्नु पर्ने अवस्था आउन सक्ने भन्दै ठाकुरले हस्ताक्षर संकलन गरेका बताइएको छ । ठाकुरलाई नेता राजेन्द्र महतोले साथ दिएका छन् । प्रधानमन्त्री ओलीले यही बैशाख २७ गते प्रतिनिधि सभामा विश्वासको मत लिन लागिरहेको अवस्थामा जसपामा भने आन्तरिक बिवाद उत्कर्षमा पुगेको छ ।

जसपामा कसको पक्षमा कार्यकारिणी सदस्य र सांसदको बहुमत पुग्ने हो त्यो भने हेर्न केही दिन पर्खनु पर्ला । किनकि दुवै पक्ष आ–आफ्ना तर्फ बहुमतका लागि कसरतमा छन् । दुबै पक्ष आ–आफ्ना अडानमा रहँदा पार्टी फुट्ने त हैन भन्ने आशंका पनि उत्तिकै छ । दुवै पक्ष प्रतिष्ठाको लडाइमा होमिएका छन् । प्रधानमन्त्री ओलीले गत वर्ष तत्कालीन राष्ट्रिय जनता पार्टी र समाजवादी पार्टीलाई अध्यादेश मार्फत विभाजन गर्न खोजेको भन्दै दुबै पार्टीबीच रातारात एकिकरण भएको थियो । फेरि प्रधानमन्त्री ओलीकै कारण फुटको डिलमा पुग्न लागेको अनुमान गरिदैछ ।