काठमाडौं । लामो समयदेखि नेपालको चिकित्सा शिक्षा क्षेत्रको समस्या समाधानको माग राख्दै आएका डा गोबिन्द केसी पुनः अनसन बस्ने भएका छन् ।
स्वास्थ्य उपचारको लागि गाउँगाउँ पुग्ने केसी यतिबेला जुम्लामा रहेका छन् । आफूले राखेको माग सरकारले पुरा नगरेको भन्दै आजबाट अनसन बस्न लागेको भएपनि प्रहरीको अवरोधका कारण बस्न नसकेको उनका सहयोगी महेन्द्र कार्कीले लोकपथलाई जानकारी दिए । “उहाँ जुम्ला आउनुभएको २० दिन जति भयो । उहाँ अहिले जुम्लाको रोयल गार्डेन होटेलमा बस्नुभएको छ । सरकारले आफ्नो माग पुरा गर्छुभनी यस अघिको अनसन तोडेपनि पुरा भएनन् । सरकारले आफ्ना मागहरु अब अक्षरस पुरा गर्न दवाव स्वरुप आजबाट अनसन बस्ने भनिएको थियो । तर प्रहरीको धरपकडका कारण पुरा नभएपनि अनसनको तयारी रहेको छ ।” उनले भने ।
कोरोना महामारीकाबीच आफ्ना मागहरु लिएर जुम्ला पुगेका केसी बसेको होटेल बाहिर प्रहरीहरुको ठुलो जत्था तैनाथ रहेको र सञ्चारकर्मीलाई समेत भेट्न नदिएको उनले बताए । उनका अनुसार अनसन बस्नको लागि समेत अवरोध गरिएको र बाहिर समेत सुरक्षा व्यवस्था कडा पारिएको छ ।
डा केसी लामो समय नेपालको चिकित्सा शिक्षा सुधारको माग राख्दै आएका छन् । यो उनको १८ औँ अनसन हो ।
यो खबर पढेर तपाईलाई कस्तो महसुस भयो ?
प्रतिक्रिया