घोप्टेभिरमा आज पनि सुक्खा पहिरो, सवारीसाधन अवरुद्ध

काठमाडौं । चितवनको इच्छाकामना गाउँपालिका–४ घोप्टेभिरमा आज बिहान सुक्खा पहिरो खस्दा पृथ्वी राजमार्ग दुईतर्फी रूपमा अवरुद्ध भएको छ ।

जिल्ला प्रहरी कार्यालयका सूचना अधिकारी चन्द्रभूषण यादवका अनुसार बिहान करिब ५ः०० बजे सडक माथिबाट सुक्खा पहिरो खसेपछि यातायात अवरुद्ध भएको हो ।

प्रहरी र सडक डिभिजन कार्यालयको पहलमा पहिरो हटाएर सडक सञ्चालनमा ल्याउने प्रयास भइरहेको उनले बताए ।

पहिरो हटाएर सडक खुलाउन एकदेखि दुई घण्टा लाग्ने अनुमान गरिएको उनले जानकारी दिए ।

यसअघि आइतबार पनि सोही स्थानमा पहिरो जाँदा आवतजावत अवरुद्ध बनेको थियो ।