काठमाडौं । नेपाली क्रिकेट टोलीका कप्तान सन्दीप लामिछानेले अन्तर्राष्ट्रिय क्रिकेटमा ३०० विकेट पूरा गर्ने पहिलो नेपाली बलरको कीर्तिमान बनाएका छन् ।
एसिसी प्रिमियर कपअन्तर्गत शनिबार युनाइटेड अरब इमिरेट्स (युएई) विरुद्धको फाइनलमा एक विकेट लिएसँगै उनले यो उपलब्धि हासिल गरेका हुन् ।
सन्दीपले हालसम्म एकदिवसीय अन्तर्राष्ट्रिय क्रिकेटमा १५८ र टी–२० अन्तर्राष्ट्रियमा १४२ विकेट लिएका छन् । उनले एकदिवसीयमा ७९ र टी–२० अन्तर्राष्ट्रियमा ७८ खेल खेलेका छन् ।
यसैगरी, सन्दीपले विदेशी मैदानमा एसिसी प्रिमियर कपको उपाधि जिताउने पहिलो नेपाली कप्तानको उपलब्धिसमेत हासिल गरेका छन् । यसअघि सन् २०२३ मा नेपालले घरेलु मैदानमा उपाधि जित्दा टोलीको कप्तानी रोहितकुमार पौडेलले गरेका थिए ।
सन्दीप एकदिवसीय एसिसी प्रिमियर कपमा लगातार दोस्रोपटक ‘प्लेयर अफ द सिरिज’ घोषित हुने पहिलो खेलाडी पनि बनेका छन् । सन् २०२३ को संस्करणमा उनले ५५ रन बनाउनुका साथै १३ विकेट लिएर उत्कृष्ट खेलाडीको पुरस्कार जितेका थिए ।
यसपालि पनि उनले उत्कृष्ट प्रदर्शन गर्दै छ खेलमा २।९८ को इकोनमी रेटमा सर्वाधिक १७ विकेट लिए । उनको प्रभावशाली प्रदर्शनले नेपाललाई दोस्रोपटक एसिया कपमा स्थान बनाउन महत्वपूर्ण योगदान पुर्याएको छ ।
यो खबर पढेर तपाईलाई कस्तो महसुस भयो ?
प्रतिक्रिया